malamat ka hadaf aaKHir mera tarz-e-bayan kyon ho

malāmat kā hadaf āḳhir mirā tarz-e-bayāñ kyoñ ho

tirī mashq-e-sitam ko bas mirī urdu zabāñ kyoñ ho

piyeñ jab mai to lutf-e-mai meñ kuchh jiddat bhī lāzim hai

vahī saaqī vahī miinā vahī pīr-e-muġhāñ kyoñ ho

koī rahbar nahīñ miltā koī rahzan hī mil jaa.e

hamesha ham-safar āḳhir ye gard-e-kārvāñ kyoñ ho

kisī se kuchh nahīñ kahtā to dīvāne ko mat chheḌo

ki dīvāna to dīvāna hai us se sargirāñ kyoñ ho

chale haiñ shaiḳh masjid ko magar mai-kash kahāñ jaa.eñ

jo mai-ḳhāna nahīñ khultā phir āḳhir ye azaañ kyoñ ho

ye duniyā ek zindāñ hai Thikāna lā-makāñ terā

yahāñ har samt dīvāreñ yahāñ merā makāñ kyoñ ho

kise fursat hamāre baad ham ko yaad rakhne kī

sirhāne qabr par apnī koī sang-e-nishāñ kyoñ ho

maiñ tere paas jab aa.uuñ to le lenā hisāb apnā

magar duniyā meñ har lamha ye vaa.iz kā bayāñ kyoñ ho

qafas meñ aatī rahtī hai safīr-e-gul sabā ham tak

to gulshan se bichhaḌne par yahāñ āh-o-fuġhāñ kyoñ ho

malamat ka hadaf aaKHir mera tarz-e-bayan kyon ho

teri mashq-e-sitam ko bas meri urdu zaban kyon ho

piyen jab mai to lutf-e-mai mein kuchh jiddat bhi lazim hai

wahi saqi wahi mina wahi pir-e-mughan kyon ho

koi rahbar nahin milta koi rahzan hi mil jae

hamesha ham-safar aaKHir ye gard-e-karwan kyon ho

kisi se kuchh nahin kahta to diwane ko mat chheDo

ki diwana to diwana hai us se sargiran kyon ho

chale hain shaiKH masjid ko magar mai-kash kahan jaen

jo mai-KHana nahin khulta phir aaKHir ye azan kyon ho

ye duniya ek zindan hai Thikana la-makan tera

yahan har samt diwaren yahan mera makan kyon ho

kise fursat hamare baad hum ko yaad rakhne ki

sirhane qabr par apni koi sang-e-nishan kyon ho

main tere pas jab aaun to le lena hisab apna

magar duniya mein har lamha ye waiz ka bayan kyon ho

qafas mein aati rahti hai safir-e-gul saba hum tak

to gulshan se bichhaDne par yahan aah-o-fughan kyon ho