mallah KHuda jaane kidhar dekh rahe hain

mallāh ḳhudā jaane kidhar dekh rahe haiñ

ham sāmne kashtī ke bhañvar dekh rahe haiñ

aatā to yaqīn un ko vafāoñ kā hamārī

vo apnī jafāoñ ko magar dekh rahe haiñ

zindāñ kī salāḳhoñ se asīrān-e-balā bhī

ahvāl-e-sar-e-rāhguzar dekh rahe haiñ

kab zulm-o-sitam ham ne na dekhā tire hāthoñ

haañ aaj ba-andāz-e-digar dekh rahe haiñ

allah re phaban surḳhī-e-ḳhūn-e-shohadā kī

ham tujh pe do-ālam kī nazar dekh rahe haiñ

maarā kise ai vaa.e tirī ḳhū-e-jafā ne

mayyat pe tujhe ḳhāk-basar dekh rahe haiñ

ai kisht-e-vafā ab to harī ho ki tujhe ham

ḳhūñ-nāb dil-e-ḳhasta se tar dekh rahe haiñ

barg-o-gul-e-afsurda haiñ ai bād-e-ḳhizānī

ham tāb-o-tab-e-barq-o-sharar dekh rahe haiñ

ḳhāmosh jo baiThe haiñ sar-e-shām se 'mohsin'

niiñd aa ga.ī yā rāh-e-sahar dekh rahe haiñ

mallah KHuda jaane kidhar dekh rahe hain

hum samne kashti ke bhanwar dekh rahe hain

aata to yaqin un ko wafaon ka hamari

wo apni jafaon ko magar dekh rahe hain

zindan ki salaKHon se asiran-e-bala bhi

ahwal-e-sar-e-rahguzar dekh rahe hain

kab zulm-o-sitam hum ne na dekha tere hathon

han aaj ba-andaz-e-digar dekh rahe hain

allah re phaban surKHi-e-KHun-e-shohada ki

hum tujh pe do-alam ki nazar dekh rahe hain

mara kise ai wae teri KHu-e-jafa ne

mayyat pe tujhe KHak-basar dekh rahe hain

ai kisht-e-wafa ab to hari ho ki tujhe hum

KHun-nab dil-e-KHasta se tar dekh rahe hain

barg-o-gul-e-afsurda hain ai baad-e-KHizani

hum tab-o-tab-e-barq-o-sharar dekh rahe hain

KHamosh jo baiThe hain sar-e-sham se 'mohsin'

nind aa gai ya rah-e-sahar dekh rahe hain