mansab-e-ishq se kuchh ohda-bara main hi hua

mansab-e-ishq se kuchh ohda-barā maiñ hī huā

tere kūche meñ sar-afrāz-e-vafā maiñ hī huā

kuchh chalī to tere āshiq se hī talvār chalī

jab huī jañg bapā mard-e-viġhā maiñ hī huā

gar khulī tujh pe hī ḳhushbū-e-nahufta koī

terā mahram bhī to ai bād-e-sabā maiñ hī huā

vo jo be-izn uḌā laatā thā ḳhushbū terī

pahle pahle to vo gustāḳh hinā maiñ hī huā

kaisī shaffāf fazā thī yahāñ avval avval

ek mausam to yahāñ bāl-kushā maiñ hī huā

kuchh terī zulf khulī to merī sāñsoñ pe khulī

tujh pe āvāra-e-ham-rañg-e-sabā maiñ hī huā

terī ḳhātir hī thā maiñ mansab-o-mimbar kā harīs

terī ḳhvāhish se faqīrulfuqarā maiñ hī huā

tere baa.is thā maiñ sayyār-o-savābit kā harīf

aur tirā izn huā jab to fanā maiñ hī huā

mansab-e-ishq se kuchh ohda-bara main hi hua

tere kuche mein sar-afraaz-e-wafa main hi hua

kuchh chali to tere aashiq se hi talwar chali

jab hui jang bapa mard-e-wigha main hi hua

gar khuli tujh pe hi KHushbu-e-nahufta koi

tera mahram bhi to ai baad-e-saba main hi hua

wo jo be-izn uDa lata tha KHushbu teri

pahle pahle to wo gustaKH hina main hi hua

kaisi shaffaf faza thi yahan awwal awwal

ek mausam to yahan baal-kusha main hi hua

kuchh teri zulf khuli to meri sanson pe khuli

tujh pe aawara-e-ham-rang-e-saba main hi hua

teri KHatir hi tha main mansab-o-mimbar ka haris

teri KHwahish se faqirulfuqara main hi hua

tere bais tha main sayyar-o-sawabit ka harif

aur tera izn hua jab to fana main hi hua