manzaron ki bhiD thi koi pas-e-manzar na tha

manzaroñ kī bhiiḌ thī koī pas-e-manzar na thā

kārvān-e-vaqt pahle aisā be-mehvar na thā

ik sadā-e-be-sadā kī guuñj thī chāroñ taraf

sirf saa.e reñgte the koī bhī paikar na thā

kaun de ilzām kis par raushnī ke qatl kā

baḌhne vaalī zulmatoñ ke haath meñ ḳhanjar na thā

thī havāoñ kī vo sāzish yā taqāzā vaqt kā

barhana the peḌ saare koī barg-e-tar na thā

apnī fitrat hī azal se sūrat-e-sīmāb thī

maiñ ravāñ thā misl-e-dariyā ghaaT kā patthar na thā

bārish-e-sang-e-malāmat yuuñ to har jānib se thī

sar-buland apnī anā thī mujh ko fikr-e-sar na thā

tai huā kuchh is tarah sahrā-e-hastī kā safar

jaise apne sar pe 'jauhar' gumbad-e-be-dar na thā

manzaron ki bhiD thi koi pas-e-manzar na tha

karwan-e-waqt pahle aisa be-mehwar na tha

ek sada-e-be-sada ki gunj thi chaaron taraf

sirf sae rengte the koi bhi paikar na tha

kaun de ilzam kis par raushni ke qatl ka

baDhne wali zulmaton ke hath mein KHanjar na tha

thi hawaon ki wo sazish ya taqaza waqt ka

barhana the peD sare koi barg-e-tar na tha

apni fitrat hi azal se surat-e-simab thi

main rawan tha misl-e-dariya ghaT ka patthar na tha

barish-e-sang-e-malamat yun to har jaanib se thi

sar-buland apni ana thi mujh ko fikr-e-sar na tha

tai hua kuchh is tarah sahra-e-hasti ka safar

jaise apne sar pe 'jauhar' gumbad-e-be-dar na tha