manzil bhi milegi raste mein tum rahguzar ki baat karo

manzil bhī milegī raste meñ tum rāhguzar kī baat karo

āġhāz-e-safar se pahle kyuuñ anjām-e-safar kī baat karo

zālim ne liyā hai sharmā kar phir gosha-e-dāmāñ chuTkī meñ

hai vaqt ki tum bebākī se ab dīda-e-tar kī baat karo

aayā hai chaman meñ mausam-e-gul aa.ī haiñ havā.eñ zindāñ tak

dīvār kī bāteñ ho leñgī is vaqt to dar kī baat karo

hai tez havā hiltā hai qafas ḳhatre meñ paḌī hai har tiilī

fariyād-e-asīrī band karo ab jumbish-e-par kī baat karo

kyuuñ dār-o-rasan ke saa.e meñ mansūr kī bāteñ karte ho

rakhnā hai jo ūñchā sar apnā to apne hī sar kī baat karo

kyuuñ ahl-e-junūñ arbāb-e-ḳhirad kī mahfil meñ ḳhāmosh raheñ

vo apne hunar kī baat kareñ tum apne hunar kī baat karo

kyā barbat-o-daf dam toḌ chuke maut aa ga.ī kyā har naġhme ko

tum mutrib-e-jām-o-mīnā ho kyuuñ teġh o sipar kī baat karo

manzil bhi milegi raste mein tum rahguzar ki baat karo

aaghaz-e-safar se pahle kyun anjam-e-safar ki baat karo

zalim ne liya hai sharma kar phir gosha-e-daman chuTki mein

hai waqt ki tum bebaki se ab dida-e-tar ki baat karo

aaya hai chaman mein mausam-e-gul aai hain hawaen zindan tak

diwar ki baaten ho lengi is waqt to dar ki baat karo

hai tez hawa hilta hai qafas KHatre mein paDi hai har tili

fariyaad-e-asiri band karo ab jumbish-e-par ki baat karo

kyun dar-o-rasan ke sae mein mansur ki baaten karte ho

rakhna hai jo uncha sar apna to apne hi sar ki baat karo

kyun ahl-e-junun arbab-e-KHirad ki mahfil mein KHamosh rahen

wo apne hunar ki baat karen tum apne hunar ki baat karo

kya barbat-o-daf dam toD chuke maut aa gai kya har naghme ko

tum mutrib-e-jam-o-mina ho kyun tegh o sipar ki baat karo