manzil-e-KHwab luTi KHatm hui kawish-e-dil

manzil-e-ḳhvāb luTī ḳhatm huī kāvish-e-dil

ab to bechārgī-e-jism hai aur kāhish-e-dil

barf sī jamne lagī mā'bad-e-tan par āḳhir

sard hone lagā ātish-kada-e-ḳhvāhish-e-dil

paañv ke aable sahlāne kī fursat kis ko

chain lene nahīñ detī hai yahāñ sozish-e-dil

ik falak-zād ke chehre pe nazar Thahrī hai

le ke jaatī hai kahāñ dekhiye ab gardish-e-dil

kyā kareñ us ke liye tan ko lagā leñ koī rog

saḳht anjān hai kartā hī nahīñ pursish-e-dil

chashm hairān judā 'aql sarāsīma alag

aur baḌhtī chalī jaatī hai idhar sāzish-e-dil

aañkh meñ bhīgī huī shaam kā manzar hī rahā

kurra-e-ḳhvāb pe hotī hī rahī bārish-e-dil

ham bhī ḳhāmosh guzar jā.eñge auroñ kī tarah

le bhī aa.ī tire kūche meñ agar laġhzish-e-dil

sard kartā hai lahū tere zamistāñ kā ḳhayāl

munjamid hone nahīñ detī magar tābish-e-dil

koī aa.e to charāġhāñ ho sabhī rastoñ par

koī Thahre to saje bazm-gah-e-ḳhvāhish-e-dil

lab agar band rahe aañkh agar sākit thī

tū jo aayā hameñ mahsūs huī jumbish-e-dil

raunaq-e-bazm se kyā haath uThānā thā ki phir

rang-e-duniyā se sivā ho ga.ī kuchh rāmish-e-dil

raakh kā Dher hī pāoge palaT aane par

gar isī tarh jalā.egī hameñ ātish-e-dil

shūmī-e-baḳht sahī zindagī kuchh saḳht sahī

phir bhī qaa.em hai abhī hurmat-e-jāñ nāzish-e-dil

manzil-e-KHwab luTi KHatm hui kawish-e-dil

ab to bechaargi-e-jism hai aur kahish-e-dil

barf si jamne lagi ma'bad-e-tan par aaKHir

sard hone laga aatish-kada-e-KHwahish-e-dil

panw ke aable sahlane ki fursat kis ko

chain lene nahin deti hai yahan sozish-e-dil

ek falak-zad ke chehre pe nazar Thahri hai

le ke jati hai kahan dekhiye ab gardish-e-dil

kya karen us ke liye tan ko laga len koi rog

saKHt anjaan hai karta hi nahin pursish-e-dil

chashm hairan juda 'aql sarasima alag

aur baDhti chali jati hai idhar sazish-e-dil

aankh mein bhigi hui sham ka manzar hi raha

kurra-e-KHwab pe hoti hi rahi barish-e-dil

hum bhi KHamosh guzar jaenge auron ki tarah

le bhi aai tere kuche mein agar laghzish-e-dil

sard karta hai lahu tere zamistan ka KHayal

munjamid hone nahin deti magar tabish-e-dil

koi aae to charaghan ho sabhi raston par

koi Thahre to saje bazm-gah-e-KHwahish-e-dil

lab agar band rahe aankh agar sakit thi

tu jo aaya hamein mahsus hui jumbish-e-dil

raunaq-e-bazm se kya hath uThana tha ki phir

rang-e-duniya se siwa ho gai kuchh ramish-e-dil

rakh ka Dher hi paoge palaT aane par

gar isi tarh jalaegi hamein aatish-e-dil

shumi-e-baKHt sahi zindagi kuchh saKHt sahi

phir bhi qaem hai abhi hurmat-e-jaan nazish-e-dil