manzil-e-maqsud ki hai justuju

manzil-e-maqsūd kī hai justujū

aur dil meñ hai usī kī aarzū

azm-e-mustahkam hai apnā ham-safar

shāhid-e-maqsūd bhī hai rū-ba-rū

chhā na jaa.e yaas kā abr-e-siyah

āsmāñ kā chāñd dekhūñ rū-ba-rū

andalīb-e-gulshan-e-ummīd huuñ

hai nigāhoñ meñ usī kā rang-o-bū

hai vo charḳh-e-irtiqā pesh-e-nazar

kar rahā huuñ maiñ usī se guftugū

kāmrānī chuum letī hai qadam

josh meñ aa.e amal kā jab lahū

bahr-e-rahmat hai nazar ke sāmne

maiñ usī paanī se kartā huuñ vuzū

yaas ke but kā pujārī kyoñ banūñ

aas ke jalve haiñ mere chār-sū

haar merā hai surayyā kī laḌī

hai isī zevar se merī aabrū

teġh-e-istiqlāl ho jab haath meñ

kyā bigāḌegā mirā charḳh-e-adū

ruḳh pe mal kar ḳhūn-e-dil un se mile

to kahā ab ho ga.e ho surḳh-rū

kyā pate kī baat kah dī hai 'nishāt'

kyoñ na ham us ko kareñ zeb-e-gulū

manzil-e-maqsud ki hai justuju

aur dil mein hai usi ki aarzu

azm-e-mustahkam hai apna ham-safar

shahid-e-maqsud bhi hai ru-ba-ru

chha na jae yas ka abr-e-siyah

aasman ka chand dekhun ru-ba-ru

andalib-e-gulshan-e-ummid hun

hai nigahon mein usi ka rang-o-bu

hai wo charKH-e-irtiqa pesh-e-nazar

kar raha hun main usi se guftugu

kaamrani chum leti hai qadam

josh mein aae amal ka jab lahu

bahr-e-rahmat hai nazar ke samne

main usi pani se karta hun wuzu

yas ke but ka pujari kyon banun

aas ke jalwe hain mere chaar-su

haar mera hai surayya ki laDi

hai isi zewar se meri aabru

tegh-e-istiqlal ho jab hath mein

kya bigaDega mera charKH-e-adu

ruKH pe mal kar KHun-e-dil un se mile

to kaha ab ho gae ho surKH-ru

kya pate ki baat kah di hai 'nishat'

kyon na hum us ko karen zeb-e-gulu