منزل مقصود ملتی ہے رہ تدبیر سے

منزل مقصود ملتی ہے رہ تدبیر سے

کچھ نہیں ہوتا ہے حاصل شکوۂ تقدیر سے

آج ڈر جاتے ہیں معمولی سی اک تعزیر سے

وہ بھی دن تھے جب گلے ملتے تھے ہم شمشیر سے

نیند اڑ جاتی ہے اس آواز کی تاثیر سے

جب اذاں دیتا ہے کوئی نغمۂ دلگیر سے

کیا لڑیں گے ہم سے وہ تلوار سے شمشیر سے

دل دہل جاتے ہیں جن کے نعرۂ تکبیر سے

آج پھر چاروں طرف اسلام پر یلغار ہے

کام لینا ہے ہمیں پھر جذبۂ شبیر سے

جب کبھی میں چاہتا ہوں اپنی صورت دیکھنا

آئنے کا کام لیتا ہوں تری تصویر سے

جذبۂ جوش جنوں میرا اب اس منزل میں ہے

حال ان کا پوچھتا پھرتا ہوں ہر رہ گیر سے

چھوڑ دینا اپنا ماحول اتنا آساں بھی نہیں

جو اندھیرے میں ہیں ان کو کیا غرض تنویر سے

اضطرابی کیفیت ہوتی ہے جب تیرے بغیر

دل کو بہلا لیتا ہوں اکثر تری تصویر سے

نبض عالم رک گئی ہوگی شب اسریٰ ضرور

بے حقیقت ضو فشاں ہلتی ہوئی زنجیر سے

اے مصورؔ دیکھ یہ بھی گردش لیل و نہار

مل گیا ہے سلسلہ تخریب کا تعمیر سے