manzil-e-maqsud milti hai rah-e-tadbir se

manzil-e-maqsūd miltī hai rah-e-tadbīr se

kuchh nahīñ hotā hai hāsil shikva-e-taqdīr se

aaj Dar jaate haiñ ma.amūlī sī ik ta.azīr se

vo bhī din the jab gale milte the ham shamshīr se

niiñd uḌ jaatī hai us āvāz kī tāsīr se

jab azaañ detā hai koī naġhma-e-dil-gīr se

kyā laḌeñge ham se vo talvār se shamshīr se

dil dahal jaate haiñ jin ke nāra-e-takbīr se

aaj phir chāroñ taraf islām par yalġhār hai

kaam lenā hai hameñ phir jazba-e-shabbīr se

jab kabhī maiñ chāhtā huuñ apnī sūrat dekhnā

aa.ine kā kaam letā huuñ tirī tasvīr se

jazba-e-josh-e-junūñ merā ab is manzil meñ hai

haal un kā pūchhtā phirtā huuñ har rah-gīr se

chhoḌ denā apnā māhaul itnā āsāñ bhī nahīñ

jo añdhere meñ haiñ un ko kyā ġharaz tanvīr se

iztirābī kaifiyat hotī hai jab tere baġhair

dil ko bahlā letā huuñ aksar tirī tasvīr se

nabz-e-ālam ruk ga.ī hogī shab-e-isrā zarūr

be-haqīqat zau-fishāñ hiltī huī zanjīr se

ai 'musavvir' dekh ye bhī gardish-e-lail-o-nahār

mil gayā hai silsila taḳhrīb kā ta.amīr se

manzil-e-maqsud milti hai rah-e-tadbir se

kuchh nahin hota hai hasil shikwa-e-taqdir se

aaj Dar jate hain mamuli si ek tazir se

wo bhi din the jab gale milte the hum shamshir se

nind uD jati hai us aawaz ki tasir se

jab azan deta hai koi naghma-e-dil-gir se

kya laDenge hum se wo talwar se shamshir se

dil dahal jate hain jin ke nara-e-takbir se

aaj phir chaaron taraf islam par yalghaar hai

kaam lena hai hamein phir jazba-e-shabbir se

jab kabhi main chahta hun apni surat dekhna

aaine ka kaam leta hun teri taswir se

jazba-e-josh-e-junun mera ab is manzil mein hai

haal un ka puchhta phirta hun har rah-gir se

chhoD dena apna mahaul itna aasan bhi nahin

jo andhere mein hain un ko kya gharaz tanwir se

iztirabi kaifiyat hoti hai jab tere baghair

dil ko bahla leta hun aksar teri taswir se

nabz-e-alam ruk gai hogi shab-e-isra zarur

be-haqiqat zau-fishan hilti hui zanjir se

ai 'musawwir' dekh ye bhi gardish-e-lail-o-nahaar

mil gaya hai silsila taKHrib ka tamir se