manzil ka jinko hosh na apna pata mile

manzil kā jin ko hosh na apnā patā mile

aise meñ rāh-e-ishq meñ kuchh ham-navā mile

dair-o-haram meñ pā na sake shaiḳh-o-barhaman

ahl-e-nazar ko jalve tire jā-ba-jā mile

allah re ehtirām ki merī jabīn-e-shauq

jhuktī ga.ī jahāñ bhī tire naqsh-e-pā mile

har har qadam pe yuuñ to mile rahnumā bahut

phir bhī ye aarzū hai koī rahnumā mile

yuuñ to qadam qadam pe mile be-shumār dost

hamdard ġham-gusār kahāñ āshnā mile

insāñ na kar sakegā abad tak ye faisla

kyā kyā milā jahāñ meñ use aur kyā mile

ab aarzū bhī dil meñ nahīñ hai mire koī

phir kyā hai laakh un kā agar dar khulā mile

vo jin kī pārsā.ī kā charchā thā har taraf

kal mai-kade meñ 'fauq' vahī pārsā mile

manzil ka jin ko hosh na apna pata mile

aise mein rah-e-ishq mein kuchh ham-nawa mile

dair-o-haram mein pa na sake shaiKH-o-barhaman

ahl-e-nazar ko jalwe tere ja-ba-ja mile

allah re ehtiram ki meri jabin-e-shauq

jhukti gai jahan bhi tere naqsh-e-pa mile

har har qadam pe yun to mile rahnuma bahut

phir bhi ye aarzu hai koi rahnuma mile

yun to qadam qadam pe mile be-shumar dost

hamdard gham-gusar kahan aashna mile

insan na kar sakega abad tak ye faisla

kya kya mila jahan mein use aur kya mile

ab aarzu bhi dil mein nahin hai mere koi

phir kya hai lakh un ka agar dar khula mile

wo jin ki parsai ka charcha tha har taraf

kal mai-kade mein 'fauq' wahi parsa mile