manzil ka mohabbat main kahin nam nahin hai

manzil kā mohabbat maiñ kahīñ naam nahīñ hai

āġhāz hī āġhāz hai anjām nahīñ hai

sayyād ye kyūñ-kar kahūñ ārām nahīñ hai

jo kal thī taḌap aaj tah-e-dām nahīñ hai

nazzāre se haañ aur bhī dil hotā hai bechain

be aap ke dekhe bhī to ārām nahīñ hai

ārām sukūñ meñ hai sukūñ maut meñ ya.anī

jiine meñ to zāhir hai ki ārām nahīñ hai

hai shaam to ab sub.h kā honā hai qayāmat

jab sub.h huī to ḳhabar-e-shām nahīñ hai

ye dard ye sozish ye taḌap aur ye aaheñ

kis muñh se kahūñ ishq meñ ārām nahīñ hai

ho dil meñ mohabbat to ho ehsās-e-mohabbat

fitrat kā ye in.aam magar aam nahīñ hai

zulfeñ ruḳh-e-pur-nūr pe kahtī haiñ bikhar ke

is shaam ke ba.ad aur koī shaam nahīñ hai

'raushan' ye mohabbat kī hai duniyā hī nirālī

miT jaanā yahāñ koī baḌā kaam nahīñ hai

manzil ka mohabbat main kahin nam nahin hai

aaghaz hi aaghaz hai anjam nahin hai

sayyaad ye kyun-kar kahun aaram nahin hai

jo kal thi taDap aaj tah-e-dam nahin hai

nazzare se han aur bhi dil hota hai bechain

be aap ke dekhe bhi to aaram nahin hai

aaram sukun mein hai sukun maut mein yani

jine mein to zahir hai ki aaram nahin hai

hai sham to ab subh ka hona hai qayamat

jab subh hui to KHabar-e-sham nahin hai

ye dard ye sozish ye taDap aur ye aahen

kis munh se kahun ishq mein aaram nahin hai

ho dil mein mohabbat to ho ehsas-e-mohabbat

fitrat ka ye inam magar aam nahin hai

zulfen ruKH-e-pur-nur pe kahti hain bikhar ke

is sham ke baad aur koi sham nahin hai

'raushan' ye mohabbat ki hai duniya hi nirali

miT jaana yahan koi baDa kaam nahin hai