manzil ki justuju thi pe manzil na mil saki

manzil kī justujū thī pe manzil na mil sakī

ham ko kisī tarah tirī mahfil na mil sakī

ham ne har ek gaam ko manzil banā liyā

āsāniyāñ to mil ga.iiñ mushkil na mil sakī

ġham bhī masarratoñ kī tarah se hai 'ārzī

māyūs-e-ġham ko lazzat-e-kāmil na mil sakī

dekhīñ hazār chashm-e-tamannā ne mahfileñ

jis kī talāsh thī vahī mahfil na mil sakī

rahrau bhī mere saath hī gum-gashta ho ga.e

ik baar mil ke phir kabhī manzil na mil sakī

jab se huā hai dast-e-talab ġham se be-niyāz

dast-e-gadā ko lazzat-e-sā.il na mil sakī

ik baar aa ke phir kabhī tūfāñ na aa sakā

kashtī-e-dil ko dūrī-e-sāhil na mil sakī

hai māvarā-e-'aql-o-ḳhirad intihā-e-ġham

manzil to mil ga.ī had-e-manzil na mil sakī

'bahzād' us kī ziist koī ziist hī nahīñ

jis ko 'atā-e-murshid-e-kāmil na mil sakī

manzil ki justuju thi pe manzil na mil saki

hum ko kisi tarah teri mahfil na mil saki

hum ne har ek gam ko manzil bana liya

aasaniyan to mil gain mushkil na mil saki

gham bhi masarraton ki tarah se hai 'arzi

mayus-e-gham ko lazzat-e-kaamil na mil saki

dekhin hazar chashm-e-tamanna ne mahfilen

jis ki talash thi wahi mahfil na mil saki

rahrau bhi mere sath hi gum-gashta ho gae

ek bar mil ke phir kabhi manzil na mil saki

jab se hua hai dast-e-talab gham se be-niyaz

dast-e-gada ko lazzat-e-sail na mil saki

ek bar aa ke phir kabhi tufan na aa saka

kashti-e-dil ko duri-e-sahil na mil saki

hai mawara-e-'aql-o-KHirad intiha-e-gham

manzil to mil gai had-e-manzil na mil saki

'bahzad' us ki zist koi zist hi nahin

jis ko 'ata-e-murshid-e-kaamil na mil saki