manzil nahin safar mein junun-e-safar mile

manzil nahīñ safar meñ junūn-e-safar mile

nā-mo'tabar ḳhushī hai ġham-e-mo'tabar mile

ham ne to yuuñ kisī pe bharosā nahīñ kiyā

phir bhī koī milā to bahut TuuT kar mile

duniyā meñ ishq hī se milī daulat-e-hayāt

aur ishq hī se fitna-e-shām-o-sahar mile

bachpan shabāb aur za.īfī ke tiin pal

lamhe jo zindagī ko mile muḳhtasar mile

us aadmī ko qissa-e-rang-e-hinā se kyā

jo apne ḳhuuñ meñ Duubā huā sar-basar mile

ye dil kī aarzū hai ki merī jabīn-e-shauq

ḳhuuñ se vuzū kare jo tirā sang-e-dar mile

har pal hai zindagī se pareshān aadmī

phir bhī ye aarzū hai ki bār-e-digar mile

pesh-e-ḳhatā ye sochnā aisā na ho kahīñ

ik lamhe kī ḳhatā kī sazā umr bhar mile

tūfān-e-bahr se koī shikva nahīñ 'fahīm'

ham ko to apnī naav ke andar bhañvar mile

manzil nahin safar mein junun-e-safar mile

na-mo'tabar KHushi hai gham-e-mo'tabar mile

hum ne to yun kisi pe bharosa nahin kiya

phir bhi koi mila to bahut TuT kar mile

duniya mein ishq hi se mili daulat-e-hayat

aur ishq hi se fitna-e-sham-o-sahar mile

bachpan shabab aur zaifi ke tin pal

lamhe jo zindagi ko mile muKHtasar mile

us aadmi ko qissa-e-rang-e-hina se kya

jo apne KHun mein Duba hua sar-basar mile

ye dil ki aarzu hai ki meri jabin-e-shauq

KHun se wuzu kare jo tera sang-e-dar mile

har pal hai zindagi se pareshan aadmi

phir bhi ye aarzu hai ki bar-e-digar mile

pesh-e-KHata ye sochna aisa na ho kahin

ek lamhe ki KHata ki saza umr bhar mile

tufan-e-bahr se koi shikwa nahin 'fahim'

hum ko to apni naw ke andar bhanwar mile