manzilon ki or jate sab ishaare mar gae

manziloñ kī or jaate sab ishāre mar ga.e

aañkh kī dahlīz par jab ḳhvāb saare mar ga.e

lamha-bhar ko chāñd muTThī meñ chhupā ke rakh liyā

lamha bhar meñ dekh to kitne sitāre mar ga.e

us ne jab ik phuul ke ruḳhsār par bosa diyā

tum ne dekhā hī nahīñ kitne nazāre mar ga.e

pāniyoñ kī chaah meñ us ke qadam uTThe to phir

ho gayā dariyā samundar aur kināre mar ga.e

us ne jab sar ko mire kāñdhe pe aa ke rakh diyā

phir shajar dīvār-o-dar aur sab sahāre mar ga.e

vaqt-e-ruḳhsat hausla jaane kahāñ gum ho gayā

soch pāgal ho ga.ī alfāz saare mar ga.e

is tarah sadqe utāre us ne apnī zaat ke

us ne apne sar se jitne log vaare mar ga.e

manzilon ki or jate sab ishaare mar gae

aankh ki dahliz par jab KHwab sare mar gae

lamha-bhar ko chand muTThi mein chhupa ke rakh liya

lamha bhar mein dekh to kitne sitare mar gae

us ne jab ek phul ke ruKHsar par bosa diya

tum ne dekha hi nahin kitne nazare mar gae

paniyon ki chah mein us ke qadam uTThe to phir

ho gaya dariya samundar aur kinare mar gae

us ne jab sar ko mere kandhe pe aa ke rakh diya

phir shajar diwar-o-dar aur sab sahaare mar gae

waqt-e-ruKHsat hausla jaane kahan gum ho gaya

soch pagal ho gai alfaz sare mar gae

is tarah sadqe utare us ne apni zat ke

us ne apne sar se jitne log ware mar gae