maqam-e-admiyyat imtihan ki manzil hai

maqām-e-ādmiyyat imtihāñ kī manzil hai

kisī ke vāste āsāñ kisī ko mushkil hai

nahīñ fareb-e-ḳhulūs aur ḳhulūs meñ koī farq

ba-yak nigāh kareñ imtiyāz mushkil hai

yahīñ se rāste imkān ke nikalte haiñ

hamārā qalb-e-musaffā ik aisī manzil hai

mirā rafīq talavvun-mizāj hai apnā

kabhī hai barq taḌaptī huī kabhī dil hai

yahī vo dil hai jo be-maut mārtā hai hameñ

hamāre siine ke andar hamārā qātil hai

hamāre 'azm pe mauqūf hai qiyām-e-safar

chaleñ to rāsta hai ruk ga.e to manzil hai

zabāñ se kyoñ kahe vo baat dil kī tū jo sune

ḳhamosh is liye har vaqt terā saa.il hai

charāġh kaun jalātā hai chaudhvīñ shab meñ

hamārī bazm kī qindīl māh-e-kāmil hai

sukūñ nasīb ba-zāhir mujhe magar 'akmal'

vatan ke vāste siine meñ dil to bismil hai

maqam-e-admiyyat imtihan ki manzil hai

kisi ke waste aasan kisi ko mushkil hai

nahin fareb-e-KHulus aur KHulus mein koi farq

ba-yak nigah karen imtiyaz mushkil hai

yahin se raste imkan ke nikalte hain

hamara qalb-e-musaffa ek aisi manzil hai

mera rafiq talawwun-mizaj hai apna

kabhi hai barq taDapti hui kabhi dil hai

yahi wo dil hai jo be-maut marta hai hamein

hamare sine ke andar hamara qatil hai

hamare 'azm pe mauquf hai qiyam-e-safar

chalen to rasta hai ruk gae to manzil hai

zaban se kyon kahe wo baat dil ki tu jo sune

KHamosh is liye har waqt tera sail hai

charagh kaun jalata hai chaudhwin shab mein

hamari bazm ki qindil mah-e-kaamil hai

sukun nasib ba-zahir mujhe magar 'akmal'

watan ke waste sine mein dil to bismil hai