maqam-e-abd pe pahunche aur aabdida hue

maqām-e-abd pe pahuñche aur ābdīda hue

to 'āsiyān-e-zamāna bhī barguzīda hue

mubārazat kī sadā.eñ thiiñ jis ke dam-ḳham se

vo teġh kund huī aur suḳhan qasīda hue

faqīr-e-shahr to kāsa-ba-dast hai lekin

tamām shahr ke faiyyaz yad-burīda hue

kisī ko izn-e-takallum nahīñ hai majlis meñ

thā jin ko zo.am-e-suḳhan harf-e-nā-shunīda hue

is ehtiyāt se ḳhanjar ne dast-kārī kī

shikan qabā pe na aa.ī badan darīda hue

ye kis ke dast-e-mohabbat ne chhū liyā ham ko

azal ke hijr-gazīd aaj ārmīda hue

kitāb-e-umr se kuchh naam miT ga.e lekin

tumhāre naam ke sab harf ḳhat-kashīda hue

jo terī bazm meñ raqsāñ the josh-e-vaslat se

vo dasht-e-hijr meñ āhū-e-nā-ramīda hue

maqam-e-abd pe pahunche aur aabdida hue

to 'asiyan-e-zamana bhi barguzida hue

mubarazat ki sadaen thin jis ke dam-KHam se

wo tegh kund hui aur suKHan qasida hue

faqir-e-shahr to kasa-ba-dast hai lekin

tamam shahr ke faiyyaz yad-burida hue

kisi ko izn-e-takallum nahin hai majlis mein

tha jin ko zoam-e-suKHan harf-e-na-shunida hue

is ehtiyat se KHanjar ne dast-kari ki

shikan qaba pe na aai badan darida hue

ye kis ke dast-e-mohabbat ne chhu liya hum ko

azal ke hijr-gazid aaj aarmida hue

kitab-e-umr se kuchh nam miT gae lekin

tumhaare nam ke sab harf KHat-kashida hue

jo teri bazm mein raqsan the josh-e-waslat se

wo dasht-e-hijr mein aahu-e-na-ramida hue