maqam-e-zat kya hai lan-tarani kis ko kahte hain

maqām-e-zāt kyā hai lan-tarānī kis ko kahte haiñ

ḳhudā hī jāntā hai dīd-bānī kis ko kahte haiñ

banā jab maiñ sanā-ḳhvān-e-mohammad to khulā mujh par

karam shafqat ināyat mehrbānī kis ko kahte

husain ibn-e-alī ne ahal-e-maktab ko batāyā hai

sināñ kī nok par qur.ān-ḳhvānī kis ko kahte haiñ

agar dariyā se hī us kī vazāhat ho nahīñ paa.ī

to pyāsā kyā batā.egā ki paanī kis ko kahte haiñ

jo ḳhud ko dā.iyān-e-hurriyat kahte nahīñ thakte

unheñ pūchheñ zarā burhān-vānī kis ko kahte haiñ

tumhārī aañkh par aayā savāl urdu ke parche meñ

batāo lājvardī arġhavānī kis ko kahte haiñ

uThāyā dosh-e-mizhgāñ par jo bār-e-ḳhvāb to jaanā

girānī kyā balā hai nā-tavānī kis ko kahte haiñ

abhī aa jā.eñge le kar sabhī asbāb mahshar ke

maiñ yūñhī pūchh baiThā thā javānī kis ko kahte haiñ

sahar se peshtar jis kī basārat chhin ga.ī 'arshad'

vahī samjhā sakegā rā.egānī kis ko kahte haiñ

maqam-e-zat kya hai lan-tarani kis ko kahte hain

KHuda hi jaanta hai did-bani kis ko kahte hain

bana jab main sana-KHwan-e-mohammad to khula mujh par

karam shafqat inayat mehrbani kis ko kahte

husain ibn-e-ali ne ahal-e-maktab ko bataya hai

sinan ki nok par quran-KHwani kis ko kahte hain

agar dariya se hi us ki wazahat ho nahin pai

to pyasa kya bataega ki pani kis ko kahte hain

jo KHud ko daiyan-e-hurriyat kahte nahin thakte

unhen puchhen zara burhan-wani kis ko kahte hain

tumhaari aankh par aaya sawal urdu ke parche mein

batao lajwardi arghawani kis ko kahte hain

uThaya dosh-e-mizhgan par jo bar-e-KHwab to jaana

girani kya bala hai na-tawani kis ko kahte hain

abhi aa jaenge le kar sabhi asbab mahshar ke

main yunhi puchh baiTha tha jawani kis ko kahte hain

sahar se peshtar jis ki basarat chhin gai 'arshad'

wahi samjha sakega raegani kis ko kahte hain