maqsud-e-jaan-o-dil shah-e-zishan aap hain

maqsūd-e-jān-o-dil shah-e-zīshān aap haiñ

haqqā ki merā diiñ mirā īmān aap haiñ

taḳhlīq-e-kā.enāt hai mansūb aap se

unvān-e-zindagī bahar-unvān aap haiñ

ham āsiyoñ ke paas kuchh is ke sivā nahīñ

baḳhshish kā hai agar koī sāmān aap haiñ

insāniyat kī kartī hai takmīl jis kī zaat

vallāh is jahāñ meñ vo insān aap haiñ

duniyā kī justujū hai na uqbā kī aarzū

merī nazar ke sāmne har aan aap haiñ

tūfāñ meñ nāḳhudā kī zarūrat nahīñ mujhe

maiñ aap kā huuñ mere nigahbān aap haiñ

allāh kā vajūd to dekhā nahīñ magar

allāh ke vajūd kī pahchān aap haiñ

'zaidī' bayāñ sifāt hoñ kyā muḳhtasar ye hai

ham par ḳhudā kī zaat kā ehsān aap haiñ

maqsud-e-jaan-o-dil shah-e-zishan aap hain

haqqa ki mera din mera iman aap hain

taKHliq-e-kaenat hai mansub aap se

unwan-e-zindagi bahar-unwan aap hain

hum aasiyon ke pas kuchh is ke siwa nahin

baKHshish ka hai agar koi saman aap hain

insaniyat ki karti hai takmil jis ki zat

wallah is jahan mein wo insan aap hain

duniya ki justuju hai na uqba ki aarzu

meri nazar ke samne har aan aap hain

tufan mein naKHuda ki zarurat nahin mujhe

main aap ka hun mere nigahban aap hain

allah ka wajud to dekha nahin magar

allah ke wajud ki pahchan aap hain

'zaidi' bayan sifat hon kya muKHtasar ye hai

hum par KHuda ki zat ka ehsan aap hain