mar gaya ek aadmi hikmat baDi rakhte hue

mar gayā ik aadmī hikmat baḌī rakhte hue

saañp ke kaaTe kī hāthoñ meñ jaḌī rakhte hue

kah rahe haiñ ham lab-e-jānāñ ko nāzuk sā gulāb

'mīr' jī kī pankhuḌī par pankhuḌī rakhte hue

fikr meñ Duubā huā bachcha nazar aayā mujhe

ik diye kī lau pe apnī phuljhaḌī rakhte hue

mere mālik maiñ tirī fayyāziyoñ par hañs paḌā

zindagī do din kī dī sharteñ kaḌī rakhte hue

apne kandhe par biThā.e mere naanā bhī chale

kachchī pakkī rahguzāroñ par chhaḌī rakhte hue

chal rahe haiñ is taraqqī ke zamāne meñ bhī log

apne apne sar pe apnī jhoñpḌī rakhte hue

ho ga.iiñ 'misdāq' nam āñkheñ amīr-e-shahr kī

tīrgī meñ rehn sone kī kaḌī rakhte hue

mar gaya ek aadmi hikmat baDi rakhte hue

sanp ke kaTe ki hathon mein jaDi rakhte hue

kah rahe hain hum lab-e-jaanan ko nazuk sa gulab

'mir' ji ki pankhuDi par pankhuDi rakhte hue

fikr mein Duba hua bachcha nazar aaya mujhe

ek diye ki lau pe apni phuljhaDi rakhte hue

mere malik main teri fayyaziyon par hans paDa

zindagi do din ki di sharten kaDi rakhte hue

apne kandhe par biThae mere nana bhi chale

kachchi pakki rahguzaron par chhaDi rakhte hue

chal rahe hain is taraqqi ke zamane mein bhi log

apne apne sar pe apni jhonpDi rakhte hue

ho gain 'misdaq' nam aankhen amir-e-shahr ki

tirgi mein rehn sone ki kaDi rakhte hue