mar jaenge pindar ka sauda na karenge

mar jā.eñge pindār kā saudā na kareñge

aisā na kareñge kabhī aisā na kareñge

vo zaḳhm bhī pahuñchā.eñ kareñ chāragarī bhī

ye bhuul kabhī mere masīhā na kareñge

phūTegī sahar dīda-e-giryāñ se hamāre

ḳhūñ-rez tabassum kā ujālā na kareñge

aa.egā zabāñ par na kabhī harf-e-shikāyat

ham zikr ġhazal meñ bhī tumhārā na kareñge

shabnam kī sifat sho.ala-mizājoñ ko nahīñ deñ

ye us kī nazākat ko gavārā na kareñge

jā.eñge sar-e-dār bhī ehrām hī bāñdhe

ham sheva-e-haq-goī ko rusvā na kareñge

ham zaḳhmoñ kī shiddat ko bayāñ kar ke bhī 'tarzī'

qātil hī kā ḳhud apne qad ūñchā na kareñge

mar jaenge pindar ka sauda na karenge

aisa na karenge kabhi aisa na karenge

wo zaKHm bhi pahunchaen karen chaaragari bhi

ye bhul kabhi mere masiha na karenge

phuTegi sahar dida-e-giryan se hamare

KHun-rez tabassum ka ujala na karenge

aaega zaban par na kabhi harf-e-shikayat

hum zikr ghazal mein bhi tumhaara na karenge

shabnam ki sifat shoala-mizajon ko nahin den

ye us ki nazakat ko gawara na karenge

jaenge sar-e-dar bhi ehram hi bandhe

hum shewa-e-haq-goi ko ruswa na karenge

hum zaKHmon ki shiddat ko bayan kar ke bhi 'tarzi'

qatil hi ka KHud apne qad uncha na karenge