mar kar tere KHayal ko Tale hue to hain

mar kar tire ḳhayāl ko Taale hue to haiñ

ham jaan de ke dil ko sambhāle hue to haiñ

be-zār ho na jaa.e kahīñ zindagī se dil

tāsīr se ḳhafā mire naale hue to haiñ

riste haiñ ab ke saal ki bahte haiñ dekhiye

phir fasl-e-gul meñ zaḳhm-e-dil aale hue to haiñ

armāñ jo yuuñ nahīñ to nikalte haiñ kis tarah

yaanī hamāre dil se nikāle hue to haiñ

haañ dard-e-ishq un pe karam kī nazar rahe

sabr o qarār tere havāle hue to haiñ

ye sohbateñ bhī dekhiye laatī haiñ rañg kyā

mehmān ḳhaar paañv ke chhāle hue to haiñ

kyā jāniye ki hashr ho kyā sub.h-e-hashr kā

bedār tere dekhne vaale hue to haiñ

'fānī' tire amal hama-tan jabr hī sahī

sāñche meñ iḳhtiyār ke Dhāle hue to haiñ

mar kar tere KHayal ko Tale hue to hain

hum jaan de ke dil ko sambhaale hue to hain

be-zar ho na jae kahin zindagi se dil

tasir se KHafa mere nale hue to hain

riste hain ab ke sal ki bahte hain dekhiye

phir fasl-e-gul mein zaKHm-e-dil aale hue to hain

arman jo yun nahin to nikalte hain kis tarah

yani hamare dil se nikale hue to hain

han dard-e-ishq un pe karam ki nazar rahe

sabr o qarar tere hawale hue to hain

ye sohbaten bhi dekhiye lati hain rang kya

mehman KHar panw ke chhaale hue to hain

kya jaaniye ki hashr ho kya subh-e-hashr ka

bedar tere dekhne wale hue to hain

'fani' tere amal hama-tan jabr hi sahi

sanche mein iKHtiyar ke Dhaale hue to hain