maraz-e-ishq se achchha nahin insan hota

maraz-e-ishq se achchhā nahīñ insāñ hotā

ye vahī dard hai jis kā nahīñ darmāñ hotā

dil-e-vahshat-zada kyoñ zulf kā ḳhvāhāñ hotā

ek to thā hī siḌī aur pareshāñ hotā

ai falak kyā huā gar hañs liye do ek ghaḌī

ham to jab jānte puurā koī armāñ hotā

aur kuchh rozoñ jo minnat kī na baḌhtī beḌī

tere dīvānoñ se māmūr bayābāñ hotā

ye na samjhe shab-e-va.ada hai qayāmat hogī

kyā jab aate ki yahāñ dafn kā sāmāñ hotā

sahar-e-hijr janāza hī nikaltā ghar se

maiñ musībat kā na ḳhūgar jo mirī jaañ hotā

zulm kaisā hī pas-e-marg vo karte lekin

laash hotī mirī aur kūcha-e-jānāñ hotā

mus.haf-e-ruḳh meñ usī ke ye sifat hai vallāh

do varaq kā bhī hai aaya kahīñ qur.āñ hotā

āj-kal ġhair se hai tujh ko jo ai zulm-pasand

kaash vo rishta-e-ulfat tirā paimāñ hotā

is girānī pe to majma.a hai ye dīvānoñ kā

qahr thā zulf kā saudā agar arzāñ hotā

vaar bas ek hī siine pe lagāyā ai gul

itne charke to lagātā ki gulistāñ hotā

'bazm' maddāh bhī hai aap kā aur zākir bhī

rahm kyoñ is pe nahīñ ai shah-e-mardāñ hotā

maraz-e-ishq se achchha nahin insan hota

ye wahi dard hai jis ka nahin darman hota

dil-e-wahshat-zada kyon zulf ka KHwahan hota

ek to tha hi siDi aur pareshan hota

ai falak kya hua gar hans liye do ek ghaDi

hum to jab jaante pura koi arman hota

aur kuchh rozon jo minnat ki na baDhti beDi

tere diwanon se mamur bayaban hota

ye na samjhe shab-e-wada hai qayamat hogi

kya jab aate ki yahan dafn ka saman hota

sahar-e-hijr janaza hi nikalta ghar se

main musibat ka na KHugar jo meri jaan hota

zulm kaisa hi pas-e-marg wo karte lekin

lash hoti meri aur kucha-e-jaanan hota

mushaf-e-ruKH mein usi ke ye sifat hai wallah

do waraq ka bhi hai aaya kahin quran hota

aaj-kal ghair se hai tujh ko jo ai zulm-pasand

kash wo rishta-e-ulfat tera paiman hota

is girani pe to majma hai ye diwanon ka

qahr tha zulf ka sauda agar arzan hota

war bas ek hi sine pe lagaya ai gul

itne charke to lagata ki gulistan hota

'bazm' maddah bhi hai aap ka aur zakir bhi

rahm kyon is pe nahin ai shah-e-mardan hota