maraz ki jin se tawaqqo hai wo dawa denge

maraz kī jin se tavaqqo' hai vo davā deñge

dilāsa deñge faqat tujh ko aasrā deñge

kaheñge ḳhud ko taraf-dār raushnī ke magar

sabhī charāġh ye jalte hue bujhā deñge

ham apne ḳhvāb kareñ muntaqil jo nasloñ meñ

hamāre baa'd ke mausam hameñ du'ā deñge

Darā Darā ke tirā e'timād chhīneñge

phir is ke baa'd tujhe ulTā mashvara deñge

tire qarīb base haiñ ḳhushāmadī ḳhūgar

falak pe lā ke tujhe ḳhaak meñ milā deñge

vahī to raah kī dīvār ban ke baiThe haiñ

vo jin se ham ko tavaqqo' thī rāsta deñge

zarā sī der meñ 'ārif' ye naav Dūbegī

ḳhudā kā Thiik pata ab ye nā-ḳhudā deñge

maraz ki jin se tawaqqo' hai wo dawa denge

dilasa denge faqat tujh ko aasra denge

kahenge KHud ko taraf-dar raushni ke magar

sabhi charagh ye jalte hue bujha denge

hum apne KHwab karen muntaqil jo naslon mein

hamare ba'd ke mausam hamein du'a denge

Dara Dara ke tera e'timad chhinenge

phir is ke ba'd tujhe ulTa mashwara denge

tere qarib base hain KHushamadi KHugar

falak pe la ke tujhe KHak mein mila denge

wahi to rah ki diwar ban ke baiThe hain

wo jin se hum ko tawaqqo' thi rasta denge

zara si der mein 'arif' ye naw Dubegi

KHuda ka Thik pata ab ye na-KHuda denge