marham nadamaton ka liye bad-hawas main

marham nadāmatoñ kā liye bad-havās maiñ

ik zaḳhm-e-be-hisī ke rahā ās-pās maiñ

dekhā jo chāñd chāñd ke dāġhoñ meñ kho gayā

tere mizāj se huā jab rū-shanās maiñ

merī kitāb-e-ishq meñ kartā hai kyā talāsh

dībācha-e-zavāl kā huuñ iqtibās maiñ

maiñ kyā mirā vajūd kyā merī hayāt kyā

duniyā-e-be-sabāt kā ḳhālī gilās maiñ

merī hujūm-e-ġham se ḳhalāsī na ho sakī

ġham kā libās dil hai to dil kā libās maiñ

mere bahut qarīb thī tāroñ kī anjuman

phir bhī kisī nigāh ko aaya na raas maiñ

kyūñkar lage ho merā nasheman sañvārne

'irfān' tum ho ḳhushk to bhīgī kapās maiñ

marham nadamaton ka liye bad-hawas main

ek zaKHm-e-be-hisi ke raha aas-pas main

dekha jo chand chand ke daghon mein kho gaya

tere mizaj se hua jab ru-shanas main

meri kitab-e-ishq mein karta hai kya talash

dibacha-e-zawal ka hun iqtibas main

main kya mera wajud kya meri hayat kya

duniya-e-be-sabaat ka KHali gilas main

meri hujum-e-gham se KHalasi na ho saki

gham ka libas dil hai to dil ka libas main

mere bahut qarib thi taron ki anjuman

phir bhi kisi nigah ko aaya na ras main

kyunkar lage ho mera nasheman sanwarne

'irfan' tum ho KHushk to bhigi kapas main