markaz-e-josh-e-junun aql ki tanwir bhi tha

markaz-e-josh-e-junūñ 'aql kī tanvīr bhī thā

vo mirā ḳhvāb mire ḳhvāb kī tā'bīr bhī thā

ek ḳhanjar hī nahīñ tishna udhar tiir bhī thā

muntazir mere liye halqa-e-zanjīr bhī thā

aabrū 'ishq kī hai ahl-e-yaqīñ se qaa.em

hosh ke vāste ye amr jū-e-shīr bhī thā

qadr kartā jo zamāna ye mire zaḳhmoñ kī

merā har zaḳhm jahāñ ke liye iksīr bhī thā

ab judā ho ke ye mahsūs huā hai mujh ko

vo mirā zauq-e-nazar fikr kī jāgīr bhī thā

kuchh ḳhabar bhī hai tujhe chhoḌ ke jaane vaale

merā ġham tere liye bā’is-e-tauqīr bhī thā

kis liye rang-e-taġhazzul pe ho nāzāñ 'kausar'

kahte haiñ agle zamāne meñ koī 'mīr' bhī thā

markaz-e-josh-e-junun 'aql ki tanwir bhi tha

wo mera KHwab mere KHwab ki ta'bir bhi tha

ek KHanjar hi nahin tishna udhar tir bhi tha

muntazir mere liye halqa-e-zanjir bhi tha

aabru 'ishq ki hai ahl-e-yaqin se qaem

hosh ke waste ye amr ju-e-shir bhi tha

qadr karta jo zamana ye mere zaKHmon ki

mera har zaKHm jahan ke liye iksir bhi tha

ab juda ho ke ye mahsus hua hai mujh ko

wo mera zauq-e-nazar fikr ki jagir bhi tha

kuchh KHabar bhi hai tujhe chhoD ke jaane wale

mera gham tere liye ba’is-e-tauqir bhi tha

kis liye rang-e-taghazzul pe ho nazan 'kausar'

kahte hain agle zamane mein koi 'mir' bhi tha