markaz-e-nur pe kajal ka andhera kar le

markaz-e-nūr pe kājal kā añdherā kar le

apnī palkoñ ko zarā aur ghanerā kar le

ye zamīñ chāñd kī rā'nā.ī se nā-vāqif hai

dil ke āñgan meñ kabhī paañv kā pherā kar le

ham alag tarh kī rakhte haiñ tavaqqo' tujh se

apnī zulfoñ ko bikher aur saverā kar le

maiñ tirī bāheñ jhaTak kar na chalā jā.ūñ kahīñ

aur mazbūt is āġhosh kā gherā kar le

mere siine meñ koī sham'-e-havas raushan hai

is ujāle ke tavassul se añdherā kar le

mom kī an-chhūī chiḌiyā ko yahī ḳhauf hai bas

barf ke peḌ pe sūraj na baserā kar le

markaz-e-nur pe kajal ka andhera kar le

apni palkon ko zara aur ghanera kar le

ye zamin chand ki ra'nai se na-waqif hai

dil ke aangan mein kabhi panw ka phera kar le

hum alag tarh ki rakhte hain tawaqqo' tujh se

apni zulfon ko bikher aur sawera kar le

main teri bahen jhaTak kar na chala jaun kahin

aur mazbut is aaghosh ka ghera kar le

mere sine mein koi sham'-e-hawas raushan hai

is ujale ke tawassul se andhera kar le

mom ki an-chhui chiDiya ko yahi KHauf hai bas

barf ke peD pe suraj na basera kar le