markaz mein bah ke zat ka mehwar na aa gire

markaz meñ bah ke zaat kā mehvar na aa gire

raste meñ merī samt samundar na aa gire

phūloñ ke gird uḌtī haiñ shīshe kī titliyāñ

gulshan meñ koī ḳhair se patthar na aa gire

qismat kā nauha maiñ ne paḌhā āsmān par

dīvār-e-ġham kahīñ mire sar par na aa gire

ūñchā na uḌ havā.eñ bahut tez ho ga.iiñ

miTTī pe TuuT kar tirā shahpar na aa gire

raqsāñ hai bāġh-e-dīd meñ vo nargisī badan

dāman meñ koī gul use chhū kar na aa gire

ġhazleñ jhulas na jaa.eñ tavārud kī dhuup meñ

Dar hai koī ḳhayāl mukarrar na aa gire

sab ḳhauf oḌh so.e anāoñ ke ḳhol meñ

uryāñ saroñ pe shauq kā chhappar na aa gire

'vāqif' ḳhudā ke hukm kī ta.amīl ke baġhair

kyoñ ḳhuld se zamīñ pe payambar na aa gire

markaz mein bah ke zat ka mehwar na aa gire

raste mein meri samt samundar na aa gire

phulon ke gird uDti hain shishe ki titliyan

gulshan mein koi KHair se patthar na aa gire

qismat ka nauha main ne paDha aasman par

diwar-e-gham kahin mere sar par na aa gire

uncha na uD hawaen bahut tez ho gain

miTTi pe TuT kar tera shahpar na aa gire

raqsan hai bagh-e-did mein wo nargisi badan

daman mein koi gul use chhu kar na aa gire

ghazlen jhulas na jaen tawarud ki dhup mein

Dar hai koi KHayal mukarrar na aa gire

sab KHauf oDh soe anaon ke KHol mein

uryan saron pe shauq ka chhappar na aa gire

'waqif' KHuda ke hukm ki tamil ke baghair

kyon KHuld se zamin pe payambar na aa gire