marna jina wafa haya kya hai

marnā jiinā vafā hayā kyā hai

ham se pūchho ye mudda.ā kyā hai

jo bhī hai saaf saaf bole vo

be-ḳhabar hai ḳhafā ḳhafā kyā hai

merā mahbūb hai mirā misra.a

bol ab terā qāfiya kyā hai

jis ko ham ne nichoḌ pheñkā hai

us javānī meñ ab bachā kyā hai

maiñ ne apne tabīb se pūchhā

dard vo hai to phir davā kyā hai

ham javānī talak pahuñch aa.e

yā-ilāhī ye mājrā kyā hai

tum ḳhudā.ī kā da.avā karte ho

tum ḳhudā ho to phir ḳhudā kyā hai

pahle jaañ mere lab tak aa jaa.e

phir batā.uñgā hausla kyā hai

ḳhushk lab tiin din kī fāqa-kashī

tum nā samjhoge karbalā kyā hai

naam 'ishrāq' hai 'azīzī' hai

sach batā terā naam kyā kyā hai

marna jina wafa haya kya hai

hum se puchho ye muddaa kya hai

jo bhi hai saf saf bole wo

be-KHabar hai KHafa KHafa kya hai

mera mahbub hai mera misra

bol ab tera qafiya kya hai

jis ko hum ne nichoD phenka hai

us jawani mein ab bacha kya hai

main ne apne tabib se puchha

dard wo hai to phir dawa kya hai

hum jawani talak pahunch aae

ya-ilahi ye majra kya hai

tum KHudai ka dawa karte ho

tum KHuda ho to phir KHuda kya hai

pahle jaan mere lab tak aa jae

phir bataunga hausla kya hai

KHushk lab tin din ki faqa-kashi

tum na samjhoge karbala kya hai

nam 'ishraq' hai 'azizi' hai

sach bata tera nam kya kya hai