marne ke liye shauq se jina kya hai

marne ke liye shauq se jiinā kyā hai

kyā kahiye zamāne se ki duniyā kyā hai

ai kaash koī raaz batā de mujh ko

ḳhāliq ne mire baare meñ likkhā kyā hai

vijdān bhī bebas hai talab ke hāthoñ

kyā shai hai burī dahr meñ achchhā kyā hai

kis ḳhvāb kī rāhoñ meñ bhaTaktā hai dil

gum-gashta nigāhoñ meñ sarāpā kyā hai

jhoñke ne badal Daalā hai ḳhushbū kā chalan

ik phuul ne ik ḳhaar ko chūmā kyā hai

qadmoñ se lipaTtī hai sarāboñ kī gard

rasta kisī manzil kā taqāzā kyā hai

dīvār ko to puuj rahā hai sūraj

dar vā hai magar dar meñ huvaidā kyā hai

jazbāt ko bhātā nahīñ koī mausam

ehsās ke har moḌ meñ saudā kyā hai

har qurb kī taqdīr meñ duurī kaisī

bastī ke muqaddar meñ ye sahrā kyā hai

poshīda bhalā kyā hai talab se 'aiman'

ummīd kī tahdārī se ifshā kyā hai

marne ke liye shauq se jina kya hai

kya kahiye zamane se ki duniya kya hai

ai kash koi raaz bata de mujh ko

KHaliq ne mere bare mein likkha kya hai

wijdan bhi bebas hai talab ke hathon

kya shai hai buri dahr mein achchha kya hai

kis KHwab ki rahon mein bhaTakta hai dil

gum-gashta nigahon mein sarapa kya hai

jhonke ne badal Dala hai KHushbu ka chalan

ek phul ne ek KHar ko chuma kya hai

qadmon se lipaTti hai sarabon ki gard

rasta kisi manzil ka taqaza kya hai

diwar ko to puj raha hai suraj

dar wa hai magar dar mein huwaida kya hai

jazbaat ko bhata nahin koi mausam

ehsas ke har moD mein sauda kya hai

har qurb ki taqdir mein duri kaisi

basti ke muqaddar mein ye sahra kya hai

poshida bhala kya hai talab se 'aiman'

ummid ki tahdari se ifsha kya hai