marte marte asar-e-soz-e-nihan baqi hai

marte marte asar-e-soz-e-nihāñ baaqī hai

bujh gayā dil kā diyā phir bhī dhuāñ baaqī hai

naujavānī to ga.ī ruuTh ke arsa guzrā

haañ javānī kā magar ab bhī nishānī baaqī hai

aa gayā un ko yaqīñ merī vafādārī kā

phir bhī kahte haiñ ki thoḌā sā gumāñ baaqī hai

agle logoñ meñ jo ik baat sharāfat kī thī

aaj ke daur meñ vo baat kahāñ baaqī hai

aa paḌā dasht meñ hangāma-e-duniyā se alag

phir bhī sar meñ vahī josh-e-ḳhafaqāñ baaqī hai

kaaT lī ḳhanjar-e-bedād ne go apnī zabāñ

lab-e-ḳhāmosh meñ ik aur bayāñ baaqī hai

ghar se be-ghar jo huā apne vatan meñ 'arshad'

ġham nahīñ mere liye kaun-o-makāñ baaqī hai

marte marte asar-e-soz-e-nihan baqi hai

bujh gaya dil ka diya phir bhi dhuan baqi hai

naujawani to gai ruTh ke arsa guzra

han jawani ka magar ab bhi nishani baqi hai

aa gaya un ko yaqin meri wafadari ka

phir bhi kahte hain ki thoDa sa guman baqi hai

agle logon mein jo ek baat sharafat ki thi

aaj ke daur mein wo baat kahan baqi hai

aa paDa dasht mein hangama-e-duniya se alag

phir bhi sar mein wahi josh-e-KHafaqan baqi hai

kaT li KHanjar-e-bedad ne go apni zaban

lab-e-KHamosh mein ek aur bayan baqi hai

ghar se be-ghar jo hua apne watan mein 'arshad'

gham nahin mere liye kaun-o-makan baqi hai