marte nahin ab ishq mein yun to aatish-e-furqat ab bhi wahi hai

marte nahīñ ab ishq meñ yuuñ to ātish-e-furqat ab bhī vahī hai

taur junūñ ke badle lekin soz-e-mohabbat ab bhī vahī hai

umr kī is manzil par bhī ham tujh par jaan nichhāvar kar deñ

go vo garmī ḳhuuñ meñ nahīñ hai dil meñ qayāmat ab bhī vahī hai

tum kyā jaano jiinā marnā ham ne kin shartoñ par sīkhā

aaj bhī aise log haiñ jin meñ shauq-e-shahādat ab bhī vahī hai

kaise kaise marhale guzre jin meñ us ne saath diyā thā

bhuul ga.e ham lekin us kī ham pe ināyat ab bhī vahī hai

kitne koh-e-girāñ kaaTe haiñ kitne sanam tarāshe 'āzar'

shauq-e-zuhūr kī har patthar meñ raqsāñ vahshat ab bhī vahī hai

marte nahin ab ishq mein yun to aatish-e-furqat ab bhi wahi hai

taur junun ke badle lekin soz-e-mohabbat ab bhi wahi hai

umr ki is manzil par bhi hum tujh par jaan nichhawar kar den

go wo garmi KHun mein nahin hai dil mein qayamat ab bhi wahi hai

tum kya jaano jina marna hum ne kin sharton par sikha

aaj bhi aise log hain jin mein shauq-e-shahadat ab bhi wahi hai

kaise kaise marhale guzre jin mein us ne sath diya tha

bhul gae hum lekin us ki hum pe inayat ab bhi wahi hai

kitne koh-e-giran kaTe hain kitne sanam tarashe 'azar'

shauq-e-zuhur ki har patthar mein raqsan wahshat ab bhi wahi hai