masafat zindagi aur hadson mein itni mubham hai

masāfat zindagī aur hādsoñ meñ itnī mub.ham hai

ḳhushī kahte haiñ jis ko ik zarā sā vaqfa-e-ġham hai

bahār-e-husn pinhāñ hai junūñ tahrīk-e-ālam hai

jahāñ ham haiñ vahāñ gunjā.ish-e-fikr-o-nazar kam hai

nigāh-e-vaqt meñ donoñ bhī shāneñ paa.ī jaatī haiñ

kahīñ zaḳhm-e-jigar hai aur kahīñ zaḳhmoñ kā marham hai

mazāq-e-ām se kyā mutma.in hoñge nazar vaale

shu.ūr-e-shādmānī tak nahīñ hai ġham to phir ġham hai

machāte haiñ tabāhī pahle phir taskīn dete haiñ

musalsal ham pe ehsāñ gulsitāñ vāloñ kā kyā kam hai

vahī dil kā lahū hai ashk kahiye yā hañsī kahiye

bhaḌak uTThe to sho.ala narm paḌ jaa.e to shabnam hai

ba-qaid-e-hosh to vo haiñ rag-e-jāñ ke qarīñ lekin

talab hadd-e-junūñ meñ ho to ye bhī fāsla kam hai

chhupā letī hai ḳhush-poshī bhī kyā kyā zaḳhm dāman meñ

sadā-e-ḳhanda-e-gul ek fariyād-e-munazzam hai

mizāj-e-dahr kyā un kī nazar ko dekh kar chup huuñ

mujhe mālūm hai hālāt meñ jitnā bhī dam-ḳham hai

payām-e-dost sunñe gosh-bar-āvāz rahtā huuñ

dhaḌaktā dil nahīñ pahlū meñ jiitā jāgtā ġham hai

vo kaise log haiñ yārab jo mar kar bhī nahīñ marte

yahāñ to zindagī meñ zindagī kā shā.iba kam hai

ajab aalam hai 'shauq' ehsās-e-ġham kī pāsdārī kā

ba-zāhir ḳhushk haiñ āñkheñ magar dāmān-e-dil nam hai

masafat zindagi aur hadson mein itni mubham hai

KHushi kahte hain jis ko ek zara sa waqfa-e-gham hai

bahaar-e-husn pinhan hai junun tahrik-e-alam hai

jahan hum hain wahan gunjaish-e-fikr-o-nazar kam hai

nigah-e-waqt mein donon bhi shanen pai jati hain

kahin zaKHm-e-jigar hai aur kahin zaKHmon ka marham hai

mazaq-e-am se kya mutmain honge nazar wale

shuur-e-shadmani tak nahin hai gham to phir gham hai

machate hain tabahi pahle phir taskin dete hain

musalsal hum pe ehsan gulsitan walon ka kya kam hai

wahi dil ka lahu hai ashk kahiye ya hansi kahiye

bhaDak uTThe to shoala narm paD jae to shabnam hai

ba-qaid-e-hosh to wo hain rag-e-jaan ke qarin lekin

talab hadd-e-junun mein ho to ye bhi fasla kam hai

chhupa leti hai KHush-poshi bhi kya kya zaKHm daman mein

sada-e-KHanda-e-gul ek fariyaad-e-munazzam hai

mizaj-e-dahr kya un ki nazar ko dekh kar chup hun

mujhe malum hai haalat mein jitna bhi dam-KHam hai

payam-e-dost sunne gosh-bar-awaz rahta hun

dhaDakta dil nahin pahlu mein jita jagta gham hai

wo kaise log hain yarab jo mar kar bhi nahin marte

yahan to zindagi mein zindagi ka shaiba kam hai

ajab aalam hai 'shauq' ehsas-e-gham ki pasdari ka

ba-zahir KHushk hain aankhen magar daman-e-dil nam hai