masam-e-sang se us dam pasine KHun ke chalte hain

masām-e-sang se us dam pasīne ḳhuuñ ke chalte haiñ

kafan-bardosh jab ham kū-e-qātil meñ nikalte haiñ

kahāñ ahl-e-junūñ chhāñv meñ zulfoñ kī Tahalte haiñ

mashaqqat kī kaḌī jab dhuup hotī hai to chalte haiñ

tumhārī anjuman meñ sirf farzāne bahalte haiñ

junūñ ke hausle to jā ke maqtal meñ nikalte haiñ

nasīm-e-nau-bahārī aa tujhe gulshan meñ pohñchā deñ

ye sahrā hai yahāñ to sirf dīvāne Tahalte haiñ

hama-dam nā-ḳhudāo bādbānoñ pe nazar rakhnā

na jaane kab ye āb-e-tah-nashīñ tevar badalte haiñ

vo hai kam-zarf jo do ghūñT pī kar Dagmagā jaa.e

ham ‘ālī-zarf jitnā piite haiñ utnā sañbhalte haiñ

hamārā dāman-e-tar shaiḳh ke jubbe se kyā kam hai

ki is ''tar-dāmanī meñ maġhfirat ke diip jalte haiñ

use andesha-hā-e-ābla-pā.ī 'sahar' kyoñ ho

vo jis ke naqsh-e-pā se anginat raste nikalte haiñ

masam-e-sang se us dam pasine KHun ke chalte hain

kafan-bardosh jab hum ku-e-qatil mein nikalte hain

kahan ahl-e-junun chhanw mein zulfon ki Tahalte hain

mashaqqat ki kaDi jab dhup hoti hai to chalte hain

tumhaari anjuman mein sirf farzane bahalte hain

junun ke hausle to ja ke maqtal mein nikalte hain

nasim-e-nau-bahaari aa tujhe gulshan mein pohncha den

ye sahra hai yahan to sirf diwane Tahalte hain

hama-dam na-KHudao baadbanon pe nazar rakhna

na jaane kab ye aab-e-tah-nashin tewar badalte hain

wo hai kam-zarf jo do ghunT pi kar Dagmaga jae

hum ‘ali-zarf jitna pite hain utna sanbhalte hain

hamara daman-e-tar shaiKH ke jubbe se kya kam hai

ki is tar-damani mein maghfirat ke dip jalte hain

use andesha-ha-e-abla-pai 'sahar' kyon ho

wo jis ke naqsh-e-pa se anginat raste nikalte hain