masale aur bhi hain ishq ke aazar ke sath

mas.ale aur bhī haiñ ishq ke āzār ke saath

sirf ik karb nahīñ umr kī raftār ke saath

haa.e mahrūmī-e-qismat ki tujhe pā na sake

ham har ik samt ga.e hasrat-e-dīdār ke saath

kaise maiñ aap kī tāzīm bajā lā.ūñgā

merī bantī hī nahīñ hāshiya-bardār ke saath

abhī ḳhush-rang hai tābānī mire āñgan kī

ranjisheñ hone lagīñ kyoñ dar-o-dīvār ke saath

dars dete haiñ bahut log payambar vaale

baiThtā koī nahīñ muflis-o-nādār ke saath

us ke hisse kā bhī ġham mujh ko atā kar de magar

an-ginat ḳhushiyāñ rahīñ maulā mire yaar ke saath

guftugū kā bhī salīqa nahīñ jin ko 'shauqī'

aaj phirte haiñ vahī mansab-o-dastār ke saath

masale aur bhi hain ishq ke aazar ke sath

sirf ek karb nahin umr ki raftar ke sath

hae mahrumi-e-qismat ki tujhe pa na sake

hum har ek samt gae hasrat-e-didar ke sath

kaise main aap ki tazim baja launga

meri banti hi nahin hashiya-bardar ke sath

abhi KHush-rang hai tabani mere aangan ki

ranjishen hone lagin kyon dar-o-diwar ke sath

dars dete hain bahut log payambar wale

baiThta koi nahin muflis-o-nadar ke sath

us ke hisse ka bhi gham mujh ko ata kar de magar

an-ginat KHushiyan rahin maula mere yar ke sath

guftugu ka bhi saliqa nahin jin ko 'shauqi'

aaj phirte hain wahi mansab-o-dastar ke sath