masarrat ko masarrat gham ko jo bas gham samajhte hain

masarrat ko masarrat ġham ko jo bas ġham samajhte haiñ

vo nādāñ zindagī kā raaz aksar kam samajhte haiñ

haqīqat meñ vahī rāz-e-haqīqat se haiñ nā-vāqif

jinheñ da.avā hai ye rāz-e-haqīqat ham samajhte haiñ

nahīñ hājat hameñ ai chārasāzo chāra-sāzī kī

ham apne dard hī ko dard kā marham samajhte haiñ

hamārī sāda-lauhī us se baḌh kar aur kyā hogī

ki ham nā-āshnā ko āshnā-e-ġham samajhte haiñ

ye kaisā raaz hai un ke hamāre darmiyāñ yārab

na jis ko vo samajhte haiñ na jis ko ham samajhte haiñ

maiñ un ke rañj ke qurbāñ maiñ un ke dard ke sadqe

jo har insān ke ġham ko ḳhud apnā ġham samajhte haiñ

samajhte haiñ 'jalīs' ab aap to aalam ko begāna

magar ham aap ko be-gāna-e-ālam samajhte haiñ

masarrat ko masarrat gham ko jo bas gham samajhte hain

wo nadan zindagi ka raaz aksar kam samajhte hain

haqiqat mein wahi raaz-e-haqiqat se hain na-waqif

jinhen dawa hai ye raaz-e-haqiqat hum samajhte hain

nahin hajat hamein ai chaarasazo chaara-sazi ki

hum apne dard hi ko dard ka marham samajhte hain

hamari sada-lauhi us se baDh kar aur kya hogi

ki hum na-ashna ko aashna-e-gham samajhte hain

ye kaisa raaz hai un ke hamare darmiyan yarab

na jis ko wo samajhte hain na jis ko hum samajhte hain

main un ke ranj ke qurban main un ke dard ke sadqe

jo har insan ke gham ko KHud apna gham samajhte hain

samajhte hain 'jalis' ab aap to aalam ko begana

magar hum aap ko be-gana-e-alam samajhte hain