masarrat mein bhi hai pinhan alam yun bhi hai aur yun bhi

masarrat meñ bhī hai pinhāñ alam yuuñ bhī hai aur yuuñ bhī

surūd-e-zindagī meñ zer-o-bam yuuñ bhī hai aur yuuñ bhī

ġhamoñ se hai garebāñ meñ itā.at kā gilā kyuuñ ho

do guuna baar hai sar par vo ḳham yuuñ bhī hai aur yuuñ bhī

tarīq-e-ḳhusravī bhī hai kināya hai ki mah ham haiñ

unheñ zebā hai ham kahnā ye ham yuuñ bhī hai aur yuuñ bhī

kamar kī justujū se kyā dahan kī aarzū kyuuñ ho

mohabbat ke marāhil meñ adam yuuñ bhī hai aur yuuñ bhī

lagī haiñ maut par āñkheñ magar hai diid kī hasrat

ye vaqt-e-naz.a hai āñkhoñ meñ dam yuuñ bhī hai aur yuuñ bhī

qasam khaa.ī hai ulfat kī ḳhudā rakkhe use qaa.em

phañsī hai jaan mushkil meñ qasam yuuñ bhī hai aur yuuñ bhī

tirī dariyā-dilī saaqī hamārī tishna-kāmī se

ḳhajil kaise na ho miinā meñ kam yuuñ bhī hai aur yuuñ bhī

hasīñ jaise koī mūrat ho dil rakhtā hai patthar kā

vo kāfir kyuuñ burā maane sanam yuuñ bhī hai aur yuuñ bhī

masarrat meñ dil-e-hirmāñ-zada ko ḳhauf hai ġham kā

nahīñ mumkin mafar ġham se ki ġham yuuñ bhī hai aur yuuñ bhī

kareñ mashq-e-taġhāful yā jafā.eñ aap farmā.eñ

yahāñ taslīm kī ḳhū se karam yuuñ bhī hai aur yuuñ bhī

nadāmat hai jafāoñ par shikāyat par itaab un ko

jabīñ kā haal kyā kahiye ki nam yuuñ bhī hai aur yuuñ bhī

muġhāñ se is ko ulfat hai ayaañ chehre se vahshat hai

koī ḳhādim se kyā pūchhe ajam yuuñ bhī hai aur yuuñ bhī

masarrat mein bhi hai pinhan alam yun bhi hai aur yun bhi

surud-e-zindagi mein zer-o-bam yun bhi hai aur yun bhi

ghamon se hai gareban mein itaat ka gila kyun ho

do guna bar hai sar par wo KHam yun bhi hai aur yun bhi

tariq-e-KHusrawi bhi hai kinaya hai ki mah hum hain

unhen zeba hai hum kahna ye hum yun bhi hai aur yun bhi

kamar ki justuju se kya dahan ki aarzu kyun ho

mohabbat ke marahil mein adam yun bhi hai aur yun bhi

lagi hain maut par aankhen magar hai did ki hasrat

ye waqt-e-naza hai aankhon mein dam yun bhi hai aur yun bhi

qasam khai hai ulfat ki KHuda rakkhe use qaem

phansi hai jaan mushkil mein qasam yun bhi hai aur yun bhi

teri dariya-dili saqi hamari tishna-kaami se

KHajil kaise na ho mina mein kam yun bhi hai aur yun bhi

hasin jaise koi murat ho dil rakhta hai patthar ka

wo kafir kyun bura mane sanam yun bhi hai aur yun bhi

masarrat mein dil-e-hirman-zada ko KHauf hai gham ka

nahin mumkin mafar gham se ki gham yun bhi hai aur yun bhi

karen mashq-e-taghaful ya jafaen aap farmaen

yahan taslim ki KHu se karam yun bhi hai aur yun bhi

nadamat hai jafaon par shikayat par itab un ko

jabin ka haal kya kahiye ki nam yun bhi hai aur yun bhi

mughan se is ko ulfat hai ayan chehre se wahshat hai

koi KHadim se kya puchhe ajam yun bhi hai aur yun bhi