mashrab-e-husn ke unwan badal jate hain

mashrab-e-husn ke unvān badal jaate haiñ

maz.hab-e-ishq meñ īmān badal jaate haiñ

ruḳh-e-jāñ se tire paikān badal jaate haiñ

ḳhāna-e-qalb ke mehmān badal jaate haiñ

ishq meñ pyaar ke imkān badal jaate haiñ

husn ke faiz se rūmān badal jaate haiñ

inqalābāt-e-tamaddun se jahāñ meñ aksar

maiñ ne dekhā hai ki insān badal jaate haiñ

ik safīne ke tasādum se ye dekhā maiñ ne

roz umaDte hue tūfān badal jaate haiñ

itnī ai dost pilā hosh na aane paa.e

ālam-e-hosh meñ armān badal jaate haiñ

manzar-e-shām-o-sahar par na ho giryāñ shabnam

ġhuncha-o-gul ke nigahbān badal jaate haiñ

aise afsāne bhī guzre haiñ nigāhoñ se bahut

jin ke anjām se unvān badal jaate haiñ

manzar-e-ām pe aate hī payām-e-mazdūr

satvat-e-shāhī ke farmān badal jaate haiñ

zindagī jazba-e-rūmān-e-musalsal hī sahī

tere ehsās se rūmān badal jaate haiñ

ḳhatm gulshan pe nahīñ 'zeb' bahāroñ kī hadeñ

mausam-e-gul meñ bayābān badal jaate haiñ

mashrab-e-husn ke unwan badal jate hain

mazhab-e-ishq mein iman badal jate hain

ruKH-e-jaan se tere paikan badal jate hain

KHana-e-qalb ke mehman badal jate hain

ishq mein pyar ke imkan badal jate hain

husn ke faiz se ruman badal jate hain

inqalabaat-e-tamaddun se jahan mein aksar

main ne dekha hai ki insan badal jate hain

ek safine ke tasadum se ye dekha main ne

roz umaDte hue tufan badal jate hain

itni ai dost pila hosh na aane pae

aalam-e-hosh mein arman badal jate hain

manzar-e-sham-o-sahar par na ho giryan shabnam

ghuncha-o-gul ke nigahban badal jate hain

aise afsane bhi guzre hain nigahon se bahut

jin ke anjam se unwan badal jate hain

manzar-e-am pe aate hi payam-e-mazdur

satwat-e-shahi ke farman badal jate hain

zindagi jazba-e-ruman-e-musalsal hi sahi

tere ehsas se ruman badal jate hain

KHatm gulshan pe nahin 'zeb' bahaaron ki haden

mausam-e-gul mein bayaban badal jate hain