maslahat-KHu kab hua hai aaina

maslahat-ḳhū kab huā hai aa.ina

sach hī sach bas boltā hai aa.ina

aaj mere dostoñ kī ḳhair ho

be-tarah mujh par miTā hai aa.ina

ek chaukīdār hai apnā zamīr

ik nigahbāñ ban gayā hai aa.ina

āshnā sīrat kī ḳhushbū se nahīñ

husn-e-zāhir par fidā hai aa.ina

ḳhud-pasandī is qadar achchhī nahīñ

sāmne har dam dharā hai aa.ina

badlā mausam mere chehre kā magar

phuul ban kar khil gayā hai aa.ina

tum se jab tark-e-ta.alluq kar liyā

dil to dil mujh se ḳhafā hai aa.ina

mujh se sargoshī sī kar ke kaan meñ

mahv-e-hairat kar gayā hai aa.ina

kis tarah kar luuñ haqīqat meñ qubūl

ik ḳhalish sī de gayā hai ā.īna

jab bhī dekhūñ rū-ba-rū hai koī aur

jaise sāzish kar rahā hai aa.ina

baat dil kī ġhaur se suntā hai ye

rāzdāñ merā banā hai aa.ina

TuuT kar 'rūmī' vo sālim hī rahā

mujh ko TukḌe kar gayā hai aa.ina

maslahat-KHu kab hua hai aaina

sach hi sach bas bolta hai aaina

aaj mere doston ki KHair ho

be-tarah mujh par miTa hai aaina

ek chaukidar hai apna zamir

ek nigahban ban gaya hai aaina

aashna sirat ki KHushbu se nahin

husn-e-zahir par fida hai aaina

KHud-pasandi is qadar achchhi nahin

samne har dam dhara hai aaina

badla mausam mere chehre ka magar

phul ban kar khil gaya hai aaina

tum se jab tark-e-talluq kar liya

dil to dil mujh se KHafa hai aaina

mujh se sargoshi si kar ke kan mein

mahw-e-hairat kar gaya hai aaina

kis tarah kar lun haqiqat mein qubul

ek KHalish si de gaya hai aaina

jab bhi dekhun ru-ba-ru hai koi aur

jaise sazish kar raha hai aaina

baat dil ki ghaur se sunta hai ye

raazdan mera bana hai aaina

TuT kar 'rumi' wo salim hi raha

mujh ko TukDe kar gaya hai aaina