masnad-e-KHak pe baiThe hain biThane wale

masnad-e-ḳhāk pe baiThe haiñ biThāne vaale

kyā 'ajab log haiñ darbār sajāne vaale

kyā mire saath abhī aur bhī kuchh honā hai

aa.e baiThe haiñ mujhe apnā banāne vaale

tirī niyyat pe bharosa nahīñ kar saktā maiñ

sāmne sab ke yūñhī ashk bahāne vaale

ḳhāl-o-ḳhad kuchh haiñ adā kuchh hai takallum kuchh hai

aise hote haiñ kahāñ log zamāne vaale

maiñ to samjhā thā ki ġhairoñ ne navāzā hai mujhe

apne hī log the sab zaḳhm lagāne vaale

maiñ koī 'aks nahīñ dhuup meñ uḌne vaalā

mujh ko sūraj kī tamāzat se Darāne vaale

haath malne ke sivā aur tujhe kuchh na milā

mirā andāza mire baa'd lagāne vaale

tū mujhe bhūlnā chāhegā jo 'shahzād' kabhī

yaad ā.ūñgā tujhe aur bhulāne vaale

masnad-e-KHak pe baiThe hain biThane wale

kya 'ajab log hain darbar sajaane wale

kya mere sath abhi aur bhi kuchh hona hai

aae baiThe hain mujhe apna banane wale

teri niyyat pe bharosa nahin kar sakta main

samne sab ke yunhi ashk bahane wale

KHal-o-KHad kuchh hain ada kuchh hai takallum kuchh hai

aise hote hain kahan log zamane wale

main to samjha tha ki ghairon ne nawaza hai mujhe

apne hi log the sab zaKHm lagane wale

main koi 'aks nahin dhup mein uDne wala

mujh ko suraj ki tamazat se Darane wale

hath malne ke siwa aur tujhe kuchh na mila

mera andaza mere ba'd lagane wale

tu mujhe bhulna chahega jo 'shahzad' kabhi

yaad aaunga tujhe aur bhulane wale