masruf hue itne is aalam-e-fani mein

masrūf hue itne is ālam-e-fānī meñ

ham hī na nazar aa.e ḳhud apnī kahānī meñ

gulshan ke nigahbāno ham ko na bhulā denā

kuchh ḳhaar bhī lāzim haiñ phūloñ kī kahānī meñ

ai dīda-e-tar tujh ko ma.alūm nahīñ shāyad

bah jaate haiñ ḳhvāb aksar ashkoñ kī ravānī meñ

ab vo bhī kisī ghar kī dīvār kā hissa haiñ

buniyād ke patthar jo baaqī the nishānī meñ

kuchh zehn meñ hotā hai aatā hai zabāñ par kuchh

kah jaate haiñ jaane kyā ham yuuñ hī ravānī meñ

kab raat guzartī hai kab din nikal aatā hai

kuchh hosh nahīñ rahtā 'zīshān' javānī meñ

masruf hue itne is aalam-e-fani mein

hum hi na nazar aae KHud apni kahani mein

gulshan ke nigahbano hum ko na bhula dena

kuchh KHar bhi lazim hain phulon ki kahani mein

ai dida-e-tar tujh ko malum nahin shayad

bah jate hain KHwab aksar ashkon ki rawani mein

ab wo bhi kisi ghar ki diwar ka hissa hain

buniyaad ke patthar jo baqi the nishani mein

kuchh zehn mein hota hai aata hai zaban par kuchh

kah jate hain jaane kya hum yun hi rawani mein

kab raat guzarti hai kab din nikal aata hai

kuchh hosh nahin rahta 'zishan' jawani mein