mast uDte parindon ko aawaz mat do ki Dar jaenge

mast uḌte parindoñ ko āvāz mat do ki Dar jā.eñge

aan kī aan meñ saare aurāq-e-manzar bikhar jā.eñge

shaam chāñdī sī ik yaad palkoñ pe rakh kar chalī jā.egī

aur ham raushnī raushnī apne andar utar jā.eñge

kaun haiñ kis jagah haiñ ki TuuTā hai jin ke safar kā nasha

ek Duubī sī āvāz aatī hai paiham ki ghar jā.eñge

ai sitāro tumheñ apnī jānib se shāyad na kuchh de sakeñ

ham magar rāstoñ meñ rakhe sab charāġhoñ ko bhar jā.eñge

vaqt meñ ik jagah sī banāte hue tiira lamhe yahī

koī andhī kahānī mire dil pe tahrīr kar jā.eñge

ham ne samjhā thā mausam kī be-rahmiyoñ ko bhī aisā kahāñ

is tarah barf girtī rahegī ki dariyā Thahar jā.eñge

aaj aayā hai ik umr kī furqatoñ meñ ajab dhyān sā

yuuñ farāmoshiyāñ kaam kar jā.eñgī zaḳhm bhar jā.eñge

mast uDte parindon ko aawaz mat do ki Dar jaenge

aan ki aan mein sare auraq-e-manzar bikhar jaenge

sham chandi si ek yaad palkon pe rakh kar chali jaegi

aur hum raushni raushni apne andar utar jaenge

kaun hain kis jagah hain ki TuTa hai jin ke safar ka nasha

ek Dubi si aawaz aati hai paiham ki ghar jaenge

ai sitaro tumhein apni jaanib se shayad na kuchh de saken

hum magar raston mein rakhe sab charaghon ko bhar jaenge

waqt mein ek jagah si banate hue tera lamhe yahi

koi andhi kahani mere dil pe tahrir kar jaenge

hum ne samjha tha mausam ki be-rahmiyon ko bhi aisa kahan

is tarah barf girti rahegi ki dariya Thahar jaenge

aaj aaya hai ek umr ki furqaton mein ajab dhyan sa

yun faramoshiyan kaam kar jaengi zaKHm bhar jaenge