mat kisi ki be-ruKHi par ghaur kar

mat kisī kī be-ruḳhī par ġhaur kar

pahle tū apnī kamī par ġhaur kar

muflis-o-nādār par bhī ye sitam

kuchh to us kī bekasī par ġhaur kar

mil ga.ī manzil use fil-faur hī

us muqaddar ke dhanī par ġhaur kar

aa rahā hai vo samundar se magar

jāñ-ba-lab hai tishnagī par ġhaur kar

hai baḌī kamzor Dorī ziist kī

chaar din kī chāñdnī par ġhaur kar

manzil-e-maqsūd paanā hai agar

āj-kal kī rahbarī par ġhaur kar

tīrgī-e-jehl chhañT jaa.e abhī

ilm kī tū raushnī par ġhaur kar

tujh ko buddhū kah rahe haiñ log sab

kuchh to apnī sādgī par ġhaur kar

ho rahe haiñ hādse 'tāriq' miyāñ

ziist kī nā-puḳhtagī par ġhaur kar

mat kisi ki be-ruKHi par ghaur kar

pahle tu apni kami par ghaur kar

muflis-o-nadar par bhi ye sitam

kuchh to us ki bekasi par ghaur kar

mil gai manzil use fil-faur hi

us muqaddar ke dhani par ghaur kar

aa raha hai wo samundar se magar

jaan-ba-lab hai tishnagi par ghaur kar

hai baDi kamzor Dori zist ki

chaar din ki chandni par ghaur kar

manzil-e-maqsud pana hai agar

aaj-kal ki rahbari par ghaur kar

tirgi-e-jehl chhanT jae abhi

ilm ki tu raushni par ghaur kar

tujh ko buddhu kah rahe hain log sab

kuchh to apni sadgi par ghaur kar

ho rahe hain hadse 'tariq' miyan

zist ki na-puKHtagi par ghaur kar