mat puchh tere hijr mein kitna hazin hun main

mat pūchh tere hijr meñ kitnā hazīñ huuñ maiñ

māyūs zindagī se ajal se qarīñ huuñ maiñ

huuñ kushta-e-firāq mirī bekasī to dekh

ik chaltī phirtī laash huuñ zinda nahīñ huuñ maiñ

tujh ko sanam ga.e hue muddat huī magar

chhoḌā thā jis maqām pe ab tak vahīñ huuñ maiñ

gum huuñ tire ḳhayāloñ kī maiñ vādiyoñ meñ aaj

mujh ko na kar talāsh ki ḳhud meñ nahīñ huuñ maiñ

ābād kar liyā hai jo apnā jahāñ alag

duniyā-e-husn-o-‘ishq meñ gosha-nashīñ huuñ maiñ

thāme hai dast-e-ġham mire dāman ko kis liye

goyā ki us ke vāste hablul-matīñ huuñ maiñ

bikhrā.e zulf sotī haiñ jis jā udāsiyāñ

'mohkam' usī makān-e-alam kā makīñ huuñ maiñ

mat puchh tere hijr mein kitna hazin hun main

mayus zindagi se ajal se qarin hun main

hun kushta-e-firaq meri bekasi to dekh

ek chalti phirti lash hun zinda nahin hun main

tujh ko sanam gae hue muddat hui magar

chhoDa tha jis maqam pe ab tak wahin hun main

gum hun tere KHayalon ki main wadiyon mein aaj

mujh ko na kar talash ki KHud mein nahin hun main

aabaad kar liya hai jo apna jahan alag

duniya-e-husn-o-‘ishq mein gosha-nashin hun main

thame hai dast-e-gham mere daman ko kis liye

goya ki us ke waste hablul-matin hun main

bikhrae zulf soti hain jis ja udasiyan

'mohkam' usi makan-e-alam ka makin hun main