mata-e-did to kya jaaniye kis se ibarat hai

matā-e-dīd to kyā jāniye kis se ibārat hai

charāġh-e-ḳhvāb hī kuchh der raushan ho ġhanīmat hai

kisī ke dar pe dastak duuñ to ḳhud bāhar nikaltā huuñ

ḳhabar kyā kaun se ghar tak tire ġham kī riyāsat hai

sañvarte zāviyoñ meñ muskurātī shakl hai merī

chaTaḳhte ā.inoñ meñ bhī koī merī hī sūrat hai

sitāroñ ke jilau meñ aur kitnī duur tak le jaa.eñ

kaho to sub.h hone tak bhalā kitnī masāfat hai

nadāmat phuul se nāzuk laboñ par barf kī sil hai

aur āñkhoñ meñ kisī biite hue din kī vazāhat hai

mire mash.al jalāte hī sitāra Duub kar niklā

maiñ samjhā huuñ mujhe bhī lauT jaane kī ijāzat hai

kabhī majbūr kar denā kabhī majbūr ho jaanā

yahī terā vatīra hai yahī terī siyāsat hai

mujhe apnī qasam 'sājid' maiñ us ke kaam ā.ūñgā

agar ye ilm ho jaa.e kise merī zarūrat hai

mata-e-did to kya jaaniye kis se ibarat hai

charagh-e-KHwab hi kuchh der raushan ho ghanimat hai

kisi ke dar pe dastak dun to KHud bahar nikalta hun

KHabar kya kaun se ghar tak tere gham ki riyasat hai

sanwarte zawiyon mein muskuraati shakl hai meri

chaTaKHte aainon mein bhi koi meri hi surat hai

sitaron ke jilau mein aur kitni dur tak le jaen

kaho to subh hone tak bhala kitni masafat hai

nadamat phul se nazuk labon par barf ki sil hai

aur aankhon mein kisi bite hue din ki wazahat hai

mere mashal jalate hi sitara Dub kar nikla

main samjha hun mujhe bhi lauT jaane ki ijazat hai

kabhi majbur kar dena kabhi majbur ho jaana

yahi tera watira hai yahi teri siyasat hai

mujhe apni qasam 'sajid' main us ke kaam aaunga

agar ye ilm ho jae kise meri zarurat hai