mata-e-hosh yahan sab ne bech Dali hai

matā-e-hosh yahāñ sab ne bech Daalī hai

tumhāre shahr kī tahzīb hī nirālī hai

ham ahl-e-dard haiñ taqsīm ho nahīñ sakte

hamārī dāstāñ gulshan meñ Daalī Daalī hai

na jaane bazm se kis ko uThā diyā tum ne

tamām shahr-e-vafā aaj ḳhālī ḳhālī hai

ta.alluqāt ko TuuTe hue zamāna huā

vo ik nigāh magar aaj bhī savālī hai

ḳhulūs bāñTtā maiñ sab ke ghar gayā lekin

tum aaj aa.e ho jab merā haath ḳhālī hai

kisī kī sham.eñ sar-e-shām bujh ga.iiñ 'nayyar'

kisī ke shahr meñ lekin abhī dīvālī hai

mata-e-hosh yahan sab ne bech Dali hai

tumhaare shahr ki tahzib hi nirali hai

hum ahl-e-dard hain taqsim ho nahin sakte

hamari dastan gulshan mein Dali Dali hai

na jaane bazm se kis ko uTha diya tum ne

tamam shahr-e-wafa aaj KHali KHali hai

talluqat ko TuTe hue zamana hua

wo ek nigah magar aaj bhi sawali hai

KHulus banTta main sab ke ghar gaya lekin

tum aaj aae ho jab mera hath KHali hai

kisi ki shamen sar-e-sham bujh gain 'nayyar'

kisi ke shahr mein lekin abhi diwali hai