mata-e-sahn-e-chaman phir lahu-lahu kya hai

matā'-e-sahn-e-chaman phir lahū-lahū kyā hai

agar yahī hai to me'yār-e-rang-o-bū kyā hai

junūñ ko bād-e-bahārī se hai numū darkār

rafūgaroñ se kaho ‘ujlat-e-rafū kyā hai

ḳhudā gavāh ba-juz is ke aarzū kyā thī

ki tum ne pūchh liyā hai ki aarzū kyā hai

idhar haiñ āñkhoñ meñ aañsū udhar jabīñ pe shikan

ye kaun jaane ki mauzū'-e-guftugū kyā hai

hai zulmatoñ se ujāloñ kī ‘azmatoñ kā bharam

nahīñ to din meñ charāġhoñ kī aabrū kyā hai

hazār jāneñ tirī ḳhūbī-e-sitam pe nisār

tujhe kamāl mubārak mirā lahū kyā hai

gila bhī ho to zabāñ par na aa.e ai 'afzal'

kisī gile kā mahal un ke rū-barū kyā hai

mata'-e-sahn-e-chaman phir lahu-lahu kya hai

agar yahi hai to me'yar-e-rang-o-bu kya hai

junun ko baad-e-bahaari se hai numu darkar

rafugaron se kaho ‘ujlat-e-rafu kya hai

KHuda gawah ba-juz is ke aarzu kya thi

ki tum ne puchh liya hai ki aarzu kya hai

idhar hain aankhon mein aansu udhar jabin pe shikan

ye kaun jaane ki mauzu'-e-guftugu kya hai

hai zulmaton se ujalon ki ‘azmaton ka bharam

nahin to din mein charaghon ki aabru kya hai

hazar jaanen teri KHubi-e-sitam pe nisar

tujhe kamal mubarak mera lahu kya hai

gila bhi ho to zaban par na aae ai 'afzal'

kisi gile ka mahal un ke ru-baru kya hai