mata-e-zist kya hum zist ka hasil samajhte hain

matā-e-zīst kyā ham ziist kā hāsil samajhte haiñ

jise sab dard kahte haiñ use ham dil samajhte haiñ

isī se dil isī se zindagi-e-dil samajhte haiñ

magar hāsil se baḌh kar sa.i-e-be-hāsil samajhte haiñ

kabhī sunte the ham ye zindagī hai vahm o be-ma.anī

magar ab maut ko bhī ḳhatra-e-bātil samajhte haiñ

bahut samjhe hue hai sheḳh rāh-o-rasm-e-manzil ko

yahāñ manzil ko bhī ham jāda-e-manzil samajhte haiñ

ubharnā ho jahāñ jī chāhtā hai Duub marne ko

jahāñ uThtī hoñ maujeñ ham vahāñ sāhil samajhte haiñ

koī sargashtā-e-rāh-e-tarīqat is ko kyā jaane

yahāñ uftādgī ko hāsil-e-manzil samajhte haiñ

tamāshā hai niyāz o naaz kī bāham kashākash kā

maiñ un kā dil samajhtā huuñ vo merā dil samajhte haiñ

abas hai dāva-e-ishq-o-mohabbat ḳhām-kāroñ ko

ye ġham dete haiñ jis ko jauhar-e-qābil samajhte haiñ

ġham-e-lā-intihā sa.i-e-musalsal shauq-e-be-pāyāñ

maqām apnā samajhte haiñ na ham manzil samajhte haiñ

mata-e-zist kya hum zist ka hasil samajhte hain

jise sab dard kahte hain use hum dil samajhte hain

isi se dil isi se zindagi-e-dil samajhte hain

magar hasil se baDh kar sai-e-be-hasil samajhte hain

kabhi sunte the hum ye zindagi hai wahm o be-mani

magar ab maut ko bhi KHatra-e-baatil samajhte hain

bahut samjhe hue hai sheKH rah-o-rasm-e-manzil ko

yahan manzil ko bhi hum jada-e-manzil samajhte hain

ubharna ho jahan ji chahta hai Dub marne ko

jahan uThti hon maujen hum wahan sahil samajhte hain

koi sargashta-e-rah-e-tariqat is ko kya jaane

yahan uftadgi ko hasil-e-manzil samajhte hain

tamasha hai niyaz o naz ki baham kashakash ka

main un ka dil samajhta hun wo mera dil samajhte hain

abas hai dawa-e-ishq-o-mohabbat KHam-karon ko

ye gham dete hain jis ko jauhar-e-qabil samajhte hain

gham-e-la-intiha sai-e-musalsal shauq-e-be-payan

maqam apna samajhte hain na hum manzil samajhte hain