mata-e-zindagi ab hijr ki babat khulegi

matā-e-zindagī ab hijr kī bābat khulegī

judā haiñ ya.anī milne kī koī sūrat khulegī

ufuq par Dūbtī ḳhushbū se phailegī udāsī

nigār-e-shām-e-ġham se shahr kī rangat khulegī

jo ik pur-shor qurbat ham guzār aa.e haiñ us kī

akele-pan meñ to kuchh aur hī shiddat khulegī

khulegī be-sabātī gul kī ik mausam meñ jā kar

ye dil kī be-sabātī to ba-yak saa.at khulegī

nafas kī anjuman meñ is purāne aa.ine par

tirī yādoñ kī dastak se na.ī hairat khulegī

tasarruf meñ rahegī kab zarūrat umr bhar kī

bachā rakhne kī ḳhātir kab koī mohlat khulegī

bas andāze lagā.e jā.eñge sail-e-balā ke

bahā le jā.egī sab kuchh to ye aafat khulegī

qayāmat kā yaqīñ thā par nahīñ ma.alūm thā ye

bapā hogī qayāmat jab to ye ḳhilqat khulegī

mata-e-zindagi ab hijr ki babat khulegi

juda hain yani milne ki koi surat khulegi

ufuq par Dubti KHushbu se phailegi udasi

nigar-e-sham-e-gham se shahr ki rangat khulegi

jo ek pur-shor qurbat hum guzar aae hain us ki

akele-pan mein to kuchh aur hi shiddat khulegi

khulegi be-sabaati gul ki ek mausam mein ja kar

ye dil ki be-sabaati to ba-yak saat khulegi

nafas ki anjuman mein is purane aaine par

teri yaadon ki dastak se nai hairat khulegi

tasarruf mein rahegi kab zarurat umr bhar ki

bacha rakhne ki KHatir kab koi mohlat khulegi

bas andaze lagae jaenge sail-e-bala ke

baha le jaegi sab kuchh to ye aafat khulegi

qayamat ka yaqin tha par nahin malum tha ye

bapa hogi qayamat jab to ye KHilqat khulegi