mata-o-mal-e-hawas hubb-e-al samne hai

matā-o-māl-e-havas hubb-e-āl sāmne hai

shikār ḳhud ko bachā dekh jaal sāmne hai

ḳhayāl-e-kohna muqayyad hai terī sochoñ meñ

rihā.ī de ki sazā yarġhamāl sāmne hai

mujhe malāl hai apnī falak-nashīnī par

yahī uruuj kī had phir zavāl sāmne hai

ragoñ meñ ḳhuun ke badle machal rahī hai aag

ziyāñ badan kā na jaañ kā vabāl sāmne hai

yahī hai kāba-e-maqsūd isī se jalva-e-arsh

uThā le chaah se qūt-e-halāl sāmne hai

vo bā-kamāl siyāq o sabāq par haavī

guzishta us kī nazar meñ ma.aal sāmne hai

sazā kī himmat-e-ālī bhī ho ga.ī paspā

hazār-hā araq-e-infi.āl sāmne hai

ḳhulūs sikka-e-uftāda jeb-e-hastī kā

uThā ke Daal de dast-e-savāl sāmne hai

hamāre sabr kī had ham pe āshkārā ho

musabbibā sabab-e-ishti.āl sāmne hai

mujhe aziiz hai sahrā-e-mumkināt kī sair

ye aur baat ki bāġh-e-muhāl sāmne hai

nazar ba-ḳhair ho 'rāhī' ki bū-e-gul kī tarah

chhupā hai vo magar us kā jamāl sāmne hai

mata-o-mal-e-hawas hubb-e-al samne hai

shikar KHud ko bacha dekh jal samne hai

KHayal-e-kohna muqayyad hai teri sochon mein

rihai de ki saza yarghamal samne hai

mujhe malal hai apni falak-nashini par

yahi uruj ki had phir zawal samne hai

ragon mein KHun ke badle machal rahi hai aag

ziyan badan ka na jaan ka wabaal samne hai

yahi hai kaba-e-maqsud isi se jalwa-e-arsh

uTha le chah se qut-e-halal samne hai

wo ba-kamal siyaq o sabaq par hawi

guzishta us ki nazar mein maal samne hai

saza ki himmat-e-ali bhi ho gai paspa

hazar-ha araq-e-infial samne hai

KHulus sikka-e-uftada jeb-e-hasti ka

uTha ke Dal de dast-e-sawal samne hai

hamare sabr ki had hum pe aashkara ho

musabbiba sabab-e-ishtial samne hai

mujhe aziz hai sahra-e-mumkinat ki sair

ye aur baat ki bagh-e-muhaal samne hai

nazar ba-KHair ho 'rahi' ki bu-e-gul ki tarah

chhupa hai wo magar us ka jamal samne hai