mataa-e-aish jo pai to muflisi na rahi

matā.a-e-aish jo paa.ī to muflisī na rahī

tum aa ga.e to kisī chiiz kī kamī na rahī

vo lau lagī ki na āñkheñ rahīñ na dil baaqī

bujhī bujhī na rahī aur lagī lagī na rahī

ye ġham rahā dam-e-ruḳhsat tumheñ nahīñ dekhā

ab aa.e tum ki jab āñkhoñ meñ raushnī na rahī

tamām umr ye dekhā karishma-e-qismat

bigaḌ bigaḌ ke banī aur banī banī na rahī

na aa.e phir vo judā jab se ho ga.e 'nashtar'

rahā bhī kyā jo mire ghar kī raushnī na rahī

mataa-e-aish jo pai to muflisi na rahi

tum aa gae to kisi chiz ki kami na rahi

wo lau lagi ki na aankhen rahin na dil baqi

bujhi bujhi na rahi aur lagi lagi na rahi

ye gham raha dam-e-ruKHsat tumhein nahin dekha

ab aae tum ki jab aankhon mein raushni na rahi

tamam umr ye dekha karishma-e-qismat

bigaD bigaD ke bani aur bani bani na rahi

na aae phir wo juda jab se ho gae 'nashtar'

raha bhi kya jo mere ghar ki raushni na rahi